Nashik News : नाशिकमध्ये १४ वर्षीय मुलीचा टबमध्ये बुडून मृत्यू, पोस्टमॉर्टम रिपोर्टमध्ये समोर आलेल्या माहितीने सर्वांनाच धक्का बसला

तबरेज शेख

Nashik News :

नाशिकमधून धक्कादायक घटना समोर आली आहे. एका १४ वर्षीय मुलीचा पाण्याच्या टबात बुडून मृत्यू झाला आहे. मुलीला चक्कर आल्याने ती पाण्याच्या टबात कोसळल्याची प्राथमिक माहिती समोर येत आहे. मात्र शवविच्छेदन अहवालात मुलगी गर्भवती असल्याची माहिती समोर आल्याने एकच खळबळ उडाली आहे. या आधारे पोलिसांनी या प्रकरणी एका आरोपीविरोधात बलात्काराचा गुन्हा दाखल केला आहे.

मृत मुलीची आई नाशिकमधील भद्रकाली परिसरात एका सोसायटीमध्ये धुणीभांडी करण्याचं काम करते. मुलीचे वडील आजारी असल्याने आई काम करण्यासाठी जाऊ शकत नव्हती. मात्र कामाला खाडा होऊ नये म्हणून मुलीच्या आईने तिला धुणीभांडी करण्यासाठी पाठवलं. (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आई-वडिलांच्या परवानगीने पीडित मुलगी शनिवारी सकाळी सोसायटीत काम करण्यास गेली. बाथरुममध्ये कपडे धुवत असतानाच तिला अचानक चक्कर आली. यानंतर ती पाटावरुन कोसळून समोरील छोट्या टबात पडली, त्यात तिचं तोंड बुडालं.  (Crime News)

यावेळी घरात उपस्थित दाम्पत्याने काही वेळातच मुलीला तातडीने खासगी रुग्णालयात दाखल केले. मात्र डॉक्टरांनी मुलीला तपासून मृत घोषित केले आणि घटनेची माहिती भद्रकाली पोलिसांना कळवली. पोलिसांनी घटनास्थळी जाऊन घटनेबाबत माहिती घेऊन तपास सुरू केला.

पोलिसांनी प्रथम मुलीचा मृतदेह शवविच्छेदनासाठी पाठवला. शवविच्छेदन अहवालात धक्कादायक माहिती समोर आली. मुलगी पाच महिन्यांची गर्भवती असल्याची माहिती समोर आली. या प्रकरणी पोलिसांना अज्ञात व्यक्तीविरोधात पोक्सो कायद्यान्वये गुन्हा दाखल केला असून पुढीत तपास सुरु आहे.