Sharad Mohol News : शरद मोहोळवर फायरिंगवेळी आरोपींची घोषणाबाजी, पोलीसही संभ्रमात, तपासाची दिशा बदलणार?

नितीन पाटणकर

Pune News :

पुण्यातील कुख्यात गुंड शरद मोहोळ हत्या प्रकरणात पोलिसांनी ८ आरोपींना अटक केली आहे. पोलीस तपासात या प्रकरणी अनेक धक्कादायक खुलासे समोर येत आहे. शरद मोहोळला संपवण्यामागे आर्थिक आणि जमिनींचे व्यवहार हे कारण असल्याचं समोर आलं होतं. मात्र आता गँगवारमधून ही हत्या झाल्याचा संशय पोलिसांना आहे.

कुख्यात गुंड शरद मोहोळ याच्यावर फायरिंग करणाऱ्या मुन्ना पोळेकरने फायरिंग करताना पुण्यातील एका कुप्रसिद्ध गुंड्याच्या नावाने घोषणाबाजी केली. मात्र आरोपींने अशी घोषणाबाजी नेमकी का केली याचा तपास पोलीस करत आहेत. (साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आरोपींना दुसऱ्या एका गुंडाच्या नावाने घोषणाबाजी करून पोलिसांचा तपास भरकटवायचा आहे का? की त्यांना खरंच दुसऱ्या एका गुंडांने शरद मोहोळला संपवण्याची सुपारी होती का? याचा तपास आता पोलीस करत आहेत. आरोपी मुन्ना पोळेकर याने केलेल्या घोषणेबाजीमुळे भविष्यात पुण्यामध्ये गँगवार होण्याची शक्यता आहे. (Crime News)

शुक्रवारी ५ जानेवारी रोजदी पुण्यातील कोथरूड परिसरात असलेल्या सुतारदराजवळील गुंड शरद मोहोळ यांच्या केबल ऑफिससमोर त्याच्यावर गोळीबार करण्यात आला होता. आरोपी मुन्ना पोळेकर आणि त्याच्या दोन साथीदारांनी यावेळी फायरिंग केली होती. या फायरिंगनंतर शरदचा रुग्णालयात उपचारादरम्यान मृत्यू झाला होता.

हत्येचं कारण काय?

मिळालेल्या माहितीनुसार, आरोपी मुन्ना पोळेकरचे शरद मोहोळसोबत मोठे वाद झाले होते. जमिनीवरून आणि आर्थिक गोष्टीवरून दोघांमध्ये वाद झाले होते. साहिल पोळेकरच्या मामाची यामध्ये मोठं नुकसान झालं होतं. मात्र शरद मोहोळच्या दहशतीमुळे त्यांना काहीही बोलता येत नव्हतं. म्हणूनच मामावर झालेल्या अन्यायाचा बदला घेण्यासाठी साहिलने हे पाऊल उचललं.

आरोपींची नावे

याप्रकरणी आत्तापर्यंत आठ आरोपींना अटक करण्यात आलीये. साहिल ऊर्फ मुन्ना पोळेकर, विठ्ठल गडले, अमित उर्फ अमर कानगुडे, चंद्रकांत शेळके, विनायक गाव्हणकर आणि दोन अॅड. रवींद्र पवार आणि संजय उडान अशी या आरोपींची नावं आहेत.