Maharashtra Politics : महायुतीच्या जागावाटपाचं घोडं कुठं अडलं? कोणत्या पक्षाला काय हवं?

Mahayuti Seat Sharing : विधानसभा निवडणुकीसाठी महायुतीने कंबर कसली आहे. विभागानुसार त्यांनी आपली ताकद पणाला लावली आहे. जागा वाटपाच्या चर्चेलाही वेग आलाय. भाजप प्रदेशाध्यक्ष चंद्रशेखर बावनकुळे यांनी महायुतीचे जागावाटप ८० टक्के पूर्ण झाल्याचं म्हटले. पण फॉर्मुला अद्याप ठरला नसल्याचे समोर आलेय.

अमित शाह यांच्या विदर्भ दौऱ्यात महायुतीचा जागा वाटपाचा प्रश्न मार्गी लागू शकतो. २३-२४ सप्टेंबर रोजी अमित शाह मराठवाडा आणि विदर्भाच्या दौऱ्यावर येत आहेत. त्यावेळी महायुतीची महत्वाची बैठक पार पडणार आहे, त्यामध्ये जागावाटपाचा तिढा सुटेल, असा अंदाज वर्तवण्यात येत आहे. पण जागावाटपाचं घोडं कुठे अडले, कोणत्या पक्षाने काय मागणी केली? याबाबत पाहूयात..

कोणत्या पक्षाला काय हवं? कुठे अडले घोडं?

भाजप, शिवसेना आणि राष्ट्रवादी यांच्यामध्ये जागावाटपावर जोरदार चर्चा सुरु आहे. महायुतीचे सध्या १८६ विद्यमान आमदार आहेत. ते सिटिंग गेटिंग फॉर्म्यूल्यानुसार त्या त्या पक्षाला मिळतील, असे म्हटले जातेय. पण सुत्रांनी दिलेल्या माहितीनुसार, सात ते आठ मतदारसंघाबाबत अडचणी आहेत. कारण, महायुतीमधील दोन्ही पक्षांनी त्यावर दावा ठोकलाय, त्यामुळे पेच निर्माण झालाय.

दुसरं मोठं कारण म्हणजे, काही मतदारसंघात २०१९ मध्ये तिन्ही पक्षांपैकी एका पक्षाने खूप कमी फरकाने जागा गमावली होती. आशाप्रकारचे जवळपास १५-१६ मतदारसंघ आहेत. यावर दुसऱ्या क्रमांकावर राहिलेल्या पक्षानेही दावा केला आहे. त्यामुळे घोळ आहे.

तिसरं कारण.... भाजपला कोणत्याही परिस्थितीमध्ये १५५ जागा हव्या आहेत. उर्वरित १३३ जागा शिंदेसेना आणि अजित पवारांना वाटून घेण्यास सांगण्यात आलेय. त्यात आणखी घोळ म्हणजे, एकनाथ शिंदेंच्या शिवसेनेला १०० जागा हव्यात.. तर अजित पवारांच्या राष्ट्रवादी काँग्रेसला ७० जागा हव्यात.

अमित शहा तिढा सोडवणार ?

केंद्रीय मंत्री अमित शाह २३-२४ रोजी मराठवाडा आणि विदर्भाच्या दौऱ्यावर येणार आहे. अमित शहा यांच्या दौऱ्यावेळी जागावाटपावर चर्चा होणार आहे. २४ तारखेला छत्रपती संभाजीनगरमध्ये महायुतीच्या नेत्यांची बैठक होणार आहे. या बैठकीत अमित शहा यांच्या उपस्थितीमध्ये जागावाटपाचा फॉर्मुला ठरण्याची शक्यता आहे. त्याशिवाय उमेदवारांची घोषणा कधी? हेही ठरवण्यात येणार आहे.