South Mumbai Lok Sabha: दक्षिण मुंबईत शिंदे गटाचा उमेदवार ठरला, या आमदाराला मिळणार तिकीट?

South Mumbai Lok Sabha:

>> आवेश तांदळे

एक मोठी बातमी समोर आली आहे. गेल्या अनेक दिवसांपासून दक्षिण मुंबई लोकसभा मतदारसंघाचा महायुतीचा उमेदवार कोण असणार, असा प्रश्न अनेकांना पडला आहे. याचबद्दल आता मोठी अपडेट समोर आली आहे. सूत्रांनी दिलेल्या माहितीनुसार, दक्षिण मुंबई लोकसभा मतदारसंघातून शिवसेना उमेदवार म्हणून भायखळा विधानसभेच्या आमदार यामिनी यशवंत जाधव यांचे नाव जवळपास निश्चित असल्याचं सांगण्यात येत आहे.

सोमवारी मुख्यमंत्री एकनाथ शिंदे यांच्या उपस्थितीत झालेल्या बैठकीत, दक्षिण मुंबई लोकसभा मतदारसंघातील आढावा बैठकीत दक्षिण मुंबईतील शिवसेना पदाधिकाऱ्यांनी यामिनी यशवंत जाधव यांच्या नावाला पसंती दिली. यामिनी यशवंत जाधव सध्या मुंबईतील भायखळा विधानसभेच्या विद्यमान आमदार आहेत.

कोण आहेत यामिनी यशवंत जाधव?

यामिनी यशवंत जाधव यांनी मुंबई महापालिका नगरसेवक म्हणूनही जबाबदारी पार पाडलीय. मुंबई महापालिकेच्या बाजार उद्यान समितीच्या अध्यक्ष होत्या. विधिमंडळ शक्ती विधेयक समितीच्या सदस्या होत्या. या समितीमध्ये त्यांनी महत्वाची भूमिका बजावली होती.