Maharashtra Election: मुख्यमंत्री आणि गोडसेंचा एकाच कारने प्रवास; ठाणे ते दादरच्या प्रवासात काय झाली चर्चा?

(रुपाली बडवे)

मुंबई: नाशिक लोकसभा मतदारसंघाच्या उमेदवारीवरून महायुतीमध्ये अजूनही तिढा कायम आहे. भाजप आणि शिवसेना शिंदे गटामध्ये या जागेवरून रस्सीखेच सुरू आहे. छगन भुजबळ यांना नाशिकची उमेदवारी मिळणार असल्याची चर्चा आहे. दुसरीकडे हेमंत गोडसे हे देखील उमेदवारीसाठी फिल्डिंग लावत आहेत. (Latest News)

आज हेमंत गोडसे यांनी पुन्हा एकदा मुख्यमंत्री शिंदे यांची भेट घेतलीय. या भेटीत सीएम यांनी पुन्हा एकदा नाशिक लोकसभेचा आढावा घेतला. विशेष म्हणजे गोडसे आणि मुख्यमंत्री शिंदे यांनी एकाच कारमधून ठाणे ते दादर असा प्रवास केला. या प्रवासात त्यांनी काय चर्चा केली याची माहिती जरी गुलदस्ता असली तरी उमेदवारीविषयी त्यांची सकारात्मक चर्चा झाल्याचं म्हटलं जात आहे.

या भेटीत नाशिकची सीट आपल्याकडेच राहील असे आश्वासन मुख्यमंत्री शिंदेंनी दिले असल्याची माहिती सूत्रांनी दिलीय. दरम्यान नाशिकची जागा राष्ट्रवादीकडे जात असल्याची चर्चा असल्याने हेमंत गोडसे आणि नाशिकचे शिवसेनेचे पदाधिकारी नाराज होते. त्यांची ही नाराजी दूर करण्याचा प्रयत्न सीएमकडून होत आहे.

उमेदवारीवरून काय म्हणाले भुजबळ

अधिकृतरित्या जोपर्यंत उमेदवारी जाहीर होत नाही, तोपर्यंत महायुतीच्या प्रत्येक पक्षाला ही जागा मागण्याचा अधिकार असल्याचं भुजबळ म्हणालेत. ज्यावेळी उमेदवाराचे नाव जाहीर होईल, त्यावेळी आम्ही सगळे एकत्रित काम करणार. नाशिकची निवडणूक महाराष्ट्रातील निवडणुकीच्या शेवटच्या टप्प्यात आहे. त्यामुळे इतर ठिकाणी तेथील वाटाघाटी झाल्याचे मंत्री छगन भुजबळ म्हणालेत.