सुशिल थोरात, अहमदनगर|ता. १३ मे २०२४
राज्यातील ११ लोकसभा मतदार संघांसाठी आज मतदान होत आहे. सकाळपासून मतदान केंद्रावर नागरिक, राजकीय मंडळी तसेच सेलिब्रिटी गर्दी करताना दिसत आहेत. ज्येष्ठ समाजसेवक अण्णा हजारे यांनीही अहमदनगरमध्ये मतदानाचा हक्क बजावला. यावेळी त्यांनी मतदारांच्या हातात देशाची चावी असल्यामुळे ही चावी योग्य पद्धतीने योग्य कुलपाला लावून योग्य उमेदवार निवडावा असे आवाहन नागरिकांना केले.
काय म्हणाले अण्णा हजारे?
"आज लोकशाहीचा मोठा उत्सव असून या उत्सवात सर्वांनी सहभागी व्हावं आणि मतदान करताना चारित्र्यशील आणि निष्कलंक माणसाला मतदान करावे. मतदारांच्या हातात देशाची चावी असल्यामुळे ही चावी योग्य पद्धतीने योग्य कुलपाला लावून योग्य उमेदवार निवडावा," असे आवाहन अण्णा हजारे यांनी केले.
तसेच "पैसे घेऊन मतदान करणे हे देशाचं दुर्दैव असल्याचे सांगत हा शहीद झालेल्या शहिदांचा अपमान आहे. म्हणूनच निष्कलंक उमेदवारांना निवडून द्या. ईडीसारखे गुन्हे उमेदवारांवर आणि राजकारणांवर दाखल नसावेत, अशाच उमेदवारांना निवडून द्या, असेही ते यावेळी म्हणाले.
यावेळी बोलताना अण्णा हजारे यांनी दिल्लीचे मुख्यमंत्री अरविंद केजरीवाल यांच्यावरही कथित मद्यघोटाळा प्रकरणावरुन जोरदार टीका केली. दारूच्या मोहाच्या पैशात तो डुबला असल्यामुळे त्यांनी हा भ्रष्टाचार केला आहे, असे अण्णा हजारे यावेळी म्हणाले. तसेच अशा लोकांना निवडून देऊ नका असेही आवाहन त्यांनी यावेळी केले.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.