Lok Sabha Election 2024:
लोकसभा निवडणुकीचे मतदानाचे चार टप्पे पार पडले असून पाचव्या टप्प्यासाठी सोमवार म्हणजेच 20 मे रोजी मतदान होणार आहे. यावेळी एकूण सात टप्प्यात मतदान होत आहे. मतदानाचा शेवटचा टप्पा 1 जून रोजी होणार असून 4 जून रोजी मतमोजणी झाल्यानंतर कोणाचे सरकार सत्तेत येणार याचा निर्णय होईल.
मात्र, एनडीए आणि इंडिया आघाडीचे नेते आधीच आपापल्या विजयाचा दावा करत आहेत. बिहारमधील बेतिया येथे एका निवडणूक सभेला केंद्रीय मंत्री अमित शहा यांनी घोषणा केली की, राहुल गांधींना 40 जागाही मिळणार नाही आणि लालूजींना चार जागाही मिळणार नाही. यातच आता पाचव्या टप्प्यातील मतदानाच्या काही तास आधी आरजेडी नेते तेजस्वी यादव यांनीही मोठा दावा केला आहे.
रविवारी संध्याकाळी पाटणा येथे माध्यमांशी संवाद साधताना तेजस्वी यांनी इंडिया आघाडीच्या विजयाचा दावा केला. ते म्हणाले की, इंडिया आघाडी जिंकली असून आम्ही 300 जागांचा टप्पा पार केला आहे. तेजस्वी यादव यांच्या दाव्याबाबत भाजपकडून सध्या कोणतीही प्रतिक्रिया आलेली नाही.
याआधी पश्चिम चंपारणमधील एका निवडणूक सभेतदरम्यान तेजस्वी यांनी दावा केला की, केंद्रात इंडिया आघाडी सरकार स्थापन होत आहे. सरकार स्थापन होताच राहुल गांधी एक कोटी तरुणांना नोकऱ्या देणार आहेत. रक्षाबंधनाच्या दिवशी गरीब भगिनींच्या खात्यावर एक लाख रुपये पाठवले जातील. प्रत्येक कुटुंबाला दोनशे युनिट मोफत वीज आणि पाचशे रुपयांचा गॅस सिलिंडर देण्यात येणार आहे.
तेजस्वी म्हणाले की, नितीश कुमार तिथे गेले नाही तर, त्यांना भाजपच्या लोकांनी हायजॅक केले आहे. मला माहित आहे की, काकांचे शरीर तेथे आहे आणि त्यांचे हृदय येथे आहे. विरोधकांवर टीका करताना ते म्हणाले की, तेजस्वीचे एक हेलिकॉप्टर रोखण्यासाठी पंतप्रधान, मुख्यमंत्री आणि अनेक मंत्री दिवसाला 20 हेलिकॉप्टरची मदत घेत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.