Kidney Issues: किडनी खराब होण्यापूर्वी डोळ्यांमध्ये दिसतात 'हे' बदल; 99% लोकं सामान्य समजून करतात दुर्लक्ष

आपल्याला वाटतं की, किडनीच्या समस्या म्हणजे थकवा, सूज येणं किंवा लघवीत होणारे बदल. पण खरं तर किडनी व्यवस्थित काम करत नसल्याची चिन्हं आपल्या डोळ्यांमध्येही दिसू शकतात. तज्ज्ञांच्या म्हणण्यानुसार, किडनी खराब होण्यापूर्वी काही लक्षणं अशी असतात जी आपल्याला डोळ्यांमध्ये दिसून येतात.

किडनीशी संबंधित ५ डोळ्यांची लक्षणं

किडनी शरीरातील घातक द्रव्यं गाळून टाकते आणि शरीराचा समतोल राखते. पण ती कमजोर होऊ लागली तर काही सुरुवातीची लक्षणं डोळ्यांमध्येही दिसतात. ही लक्षणं काय आहेत ती पाहूयात.

सततची डोळ्यांची सूज

सकाळी उठल्यावर डोळे सुजलेलं दिसणं सामान्य आहे. पण ही सूज पुरेशी विश्रांती घेतल्यावरही न उतरल्यास ती ‘प्रोटिन्युरिया’चं लक्षण असू शकतं. यात लघवीतून प्रोटीन बाहेर पडतं. जे किडनीच्या नुकसानीकडे स्पष्ट इशारा देते.

अस्पष्ट दिसणं

अचानक धूसर दिसणं हे उच्च रक्तदाब किंवा मधुमेहामुळे होऊ शकतं. हे दोन्ही आजार किडनीच्या समस्यांचं प्रमुख कारण मानलं जातात. यामुळे डोळ्यांतील लहान रक्तवाहिन्या खराब होतात आणि अचानक दृष्टी कमी होण्याचा धोका निर्माण होतो.

कोरडेपणा व डोळ्यांमध्ये खाज

दीर्घकालीन किडनीच्या आजाराने ग्रस्त रुग्णांमध्ये विशेषतः डायलिसिस घेणाऱ्यांमध्ये डोळ्यांचा कोरडेपणा जाणवतो. हे शरीरातील काही घटकांचा समतोल बिघडल्यामुळे होतं. त्यामुळे डोळे कोरडे, खडबडीत किंवा अस्वस्थ वाटतात.

डोळे वारंवार लाल होणं

डोळ्यांचे वारंवार लालसर होणं हे अनियंत्रित रक्तदाब किंवा मधुमेहाचं लक्षण असू शकतं. क्वचित प्रसंगी, लुपस नेफ्रायटिससारख्या किडनीसंबंधी आजारामुळेही डोळ्यांमध्ये समस्या उद्भवू शकतात.

रंग ओळखण्यात अडचण

काहीवेळा किडनीच्या आजारामुळे डोळ्यांच्या मागील पडद्यावर (रेटिना) किंवा दृष्टी नसावर परिणाम होतो. त्यामुळे विशेषतः निळ्या आणि पिवळ्या रंगांच्या छटा व्यवस्थित दिसत नाहीत.