लहान मुलांमध्ये आढळणारा किडनीचा कॅन्सर म्हणजेच विल्म्स ट्यूमर हा दुर्मिळ आजार मानला जातो. हा आजार जर वेळेत ओळखला गेला नाही तर तो गंभीर ठरू शकतो. विशेषतः 2 ते 5 वर्षे वयोगटातील मुलांमध्ये हा आजार अधिक प्रमाणात दिसून येतो. सुरुवातीच्या टप्प्यात याची लक्षणं स्पष्ट नसल्याने अनेकदा पालकांचं त्याकडे दुर्लक्ष होते. मात्र काही संकेत असे आहेत, जे कधीही दुर्लक्षित करू नयेत, असं तज्ज्ञांचं म्हणणं आहे.
या आजारामध्ये सर्वात सुरुवातीचं आणि अनेकदा दुर्लक्षित होणारं लक्षण म्हणजे मुलाच्या पोटात दिसणारी सूज किंवा गाठ. ही गाठ तयार झाली की वेदना होत नाहीत. अनेक पालकांना ती मुलाला अंघोळ घालताना किंवा खेळताना अचानक जाणवते. साध्या पोटफुगीप्रमाणे ही सूज कमी-जास्त होत नाही.
काही पालक याला बद्धकोष्ठता किंवा तात्पुरती पोटाची समस्या समजून दुर्लक्ष करतात. अशावेळी जर पालकांना मुलांमध्ये ही सूज कायम दिसत असेल तर तातडीने डॉक्टरांचा सल्ला घेणं आवश्यक आहे.
त्याचप्रमाणे वारंवार येणारा ताप हे देखील एक महत्त्वाचं लक्षण ठरू शकतं. मुलांना हवामान बदलामुळे किंवा व्हायरल संसर्गामुळे ताप येणं सामान्य आहे. मात्र कोणतंही स्पष्ट कारण नसताना सतत ताप येत असेल तर तो शरीरातील अंतर्गत समस्येचा संकेत असू शकतो. विल्म्स ट्यूमरच्या अनेक रुग्णांमध्ये थकवा, भूक कमी लागणं आणि सतत अशक्तपणा जाणवण्याची तक्रारही दिसून येते.
लघवीत रक्त दिसणं हे देखील गंभीर लक्षणांपैकी एक आहे. काही वेळा लघवीचा रंग किंचित गुलाबी दिसू शकतो. तर काही प्रकरणांमध्ये तपासणी केल्यानंतरच रक्त असल्याचं निदर्शनास येतं. अनेकदा याला साधं युरीन इन्फेक्शन समजण्यात येतं. मात्र वारंवार लघवीत रक्त दिसत असेल तर डॉक्टरांना दाखवून योग्य ती तपासणी केली पाहिजे.
काही मुलांना पोटात किंवा कंबरेच्या बाजूला वेदना जाणवू शकतात. विशेषतः धावणं किंवा खेळताना हा त्रास अधिक जाणवतो. अनेक पालक याकडे गॅस, मसल पेन किंवा साध्या दुखण्याप्रमाणे पाहतात. पण एका ठिकाणी सतत वेदना होत असतील, तर त्यामागे गंभीर कारण असू शकतात. काही दुर्मिळ प्रकरणांमध्ये नियमित तपासणीदरम्यान मुलांचा रक्तदाब वाढलेला देखील आढळतो. डॉक्टरांच्या मते, ट्यूमर किडनीवर दबाव टाकत असल्यामुळे असे होऊ शकते.
लहान वयातील किडनीच्या कॅन्सरची अनेक लक्षणं सुरुवातीला सौम्य आणि अस्पष्ट असतात. त्यामुळे पालकांनी मुलांच्या खाण्यापिण्याच्या सवयी आणि शरीरात होणारे बदल याकडे बारकाईने लक्ष देणं गरजेचं आहे. वेळेत निदान झाल्यास हा आजार ९० टक्के बरा होतो.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.