Inhaled insulin: डायबेटीजग्रस्तांची इन्सुलिनच्या इंजेक्शनची कटकट संपणार; आता श्वासाद्वारे घेता येणार इन्सुलिन

तुम्हाला मधुमेह म्हणजेच डायबेटीज असेल आणि रोज इन्सुलिन इंजेक्शन घेऊन तुम्ही कंटाळला असाल तर तुमच्यासाठी गोड बातमी आहे. ही बातमी म्हणजे इन्सुलिन आता सुईने नव्हे तर चक्क श्वासाद्वारेही घेता येणार आहे. मधुमेहाच्या रुग्णांसाठी हा मोठा दिलासा असणार आहे.

टाइप १ आणि टाइप २ मधुमेह असलेल्या लोकांमध्ये रक्तातील साखरेची पातळी नियंत्रित करण्यासाठी इन्सुलिन दिले जाते. सध्या, इन्सुलिन इंजेक्शनच्या स्वरूपात येतं. सिप्ला कंपनीने भारतात इनहेलेबल इन्सुलिन अफ्रेझा लाँच करण्याची घोषणा केली आहे. सिप्लाचे ग्लोबल चीफ ऑपरेटिंग ऑफिसर यांनी या इन्सुलिनची वैशिष्ट्ये सांगितली आहेत.

कसा घ्याल इन्सुलिनचा डोस ?

मॅनकाइंड कॉर्पोरेशन कंपनीने 2015 मध्ये अमेरीकेत 'अफ्रेझा' लाँच केलं. भारतात नुकतेच सेंट्रल ड्रग स्टँडर्ड कंट्रोल कॉर्पोरेशन (CDSCO) कडून 'अफ्रेझा'ला मान्यता मिळालीये. हे औषध एका लहान इनहेलर उपकरणाद्वारे सिंगल-यूज कार्ट्रिजमधून दिलं जातं. डॉक्टरांच्या निर्देशानुसार तुमचा डोस निवडायचा. तंत्रज्ञानाचा वापर करून पावडर केलेलं इन्सुलिन फुफ्फुसांमधून रक्तप्रवाहात वेगाने शोषलं जातं. त्यामुळेच हे इन्सुलिन पारंपारिक इंजेक्शनपेक्षा खूप जलद रक्तातील साखर नियंत्रण करते.

भारत मधुमेहाची राजधानी होण्याचा धोका आहे. कारण पुरुष, महिला दोघांमध्येही मधुमेहाचा धोका समान वेगाने वाढत आहे. गंभीर बाब म्हणजे लहान मुलांमध्येही याच प्रमाण वाढत चाललं आहे. भविष्यात देशात मधुमेहाचे 15 कोटी रुग्ण असण्याचा इशारा तज्ज्ञांनी दिला आहे.

भारतात 1 कोटी 10 लाख जण मधुमेहाने ग्रस्त आहेत. त्यापैकी 10 ते 15 टक्के लोकांना इन्सुलिन थेरपीची आवश्यकता आहे. मात्र यापैकी फक्त 40 टक्क्या पेक्षा कमी रुग्ण नियमित उपचार घेत आहेत. एका अंदाजानुसार भारतात इन्सुलिन वापरणाऱ्यांची संख्या अंदाजे 50 लाख 48 हजार इतकी आहे.

लहान-मोठ्या अनेक रुग्णांना इंजेक्शनची भिती वाटते. मात्र आता या इनहेलर इन्सुलिनमुळे डायबेटीजचं व्यवस्थापन करणे सोपं होणार आहे. खरतर आजार झाल्यावर उपचार घेण्यापेक्षा आधीच काळजी घेणे जास्त चांगले असते. म्हणूनच शरीरातील साखर वाढू नये यासाठी आहारवर नियंत्रण असणे, व्यायाम करणे तितकच गरजेचे आहे.