Monsoon Masala Preservation Tips: स्वयंपाकघरातील मसाल्यांना पावसाळ्यात बुरशी लागते ? याप्रकारे करा स्टोअर, वर्षभर टिकतील

How To Store Spices During Rainy Season : पावसाळा म्हटलं की, घरात ओलावा तयार होतो त्यामुळे कुबट वास येतो. स्वयंपाकघरातील पदार्थ खराब होतात. आपल्यापैकी बहुतांश स्त्रिया या उन्हाळ्यात साठवणीचे पदार्थ तयार करतात परंतु, पावसाळ्यात ते लगेच खराब होतात.

या काळात सर्वाधिक खराब होतात ते मसाले. खराब मसाले अन्नपदार्थात वापरल्याने जेवण तर खराब होतेच पण आरोग्याला देखील हानी होऊ शकते. पावसाळ्यात मसाले कसे साठवायचे याविषयी अनेक गृहिणींना माहीत नसते. पण आज आम्ही तुम्हाला सोपी अशी ट्रिक सांगणार आहोत ज्याच्या मदतीने मसाला खराबही होणार नाही व त्याला बुरशीही लागणार नाही जाणून घेऊया त्याबद्दल सविस्तर

मसाले अधिक काळ साठवण्यासाठी या 5 टिप्स फॉलो करा

1. जर तुम्ही अधिक सूर्यप्रकाशात मसाल्याचा (Spices) डब्बा ठेवत असाल तर असे करणे टाळा. सूर्याची अतिनील किरणे हे मसाल्यांसाठी हानीकारक असतात. त्यामुळे मसाल्यांचा सुगंध निघून जातो, ते काळे पडतात.

2. ओलावा व कीटकांपासून मसाले सुरक्षित ठेवण्यासाठी बरेच लोक मसाले फ्रीजमध्ये (Fridge) ठेवतात. यामुळे मसाले काही दिवस टिकतात खरे पण याच्या चवीत बदल होतो. तसेच जर फ्रीजमध्ये मसाले ठेवत असाल तर त्याला एअर-लॉक कंटेनरमध्ये ठेवा.

3. रेडीमेड मसाला आणण्याऐवजी तो अख्खा किंवा खड्या मसाल्याच्या स्वरुपात साठवल्यास तो खराब ही होणार नाही व त्याला किडही लागणार नाही.

4. अनेक गृहिणी पावसाळ्यात एकाच वेळी अनेक मसाले दळण्याची चूक करतात. तसेच ते भल्या मोठ्या बरणीत त्याची साठवणूक करतात. त्यामुळे मसाले खराब होतात. मसाले दळताना त्याचे प्रमाण कमी ठेवा तसेच बरणी देखील छोटी वापरा. ज्यामुळे त्याचा सुगंध व चव दोन्ही टिकून राहातील.

5. स्वयंपाकघरातील (Kitchen) सगळ्या महत्त्वाचा मसाला म्हणजे लवंग. लवंग ही जेवणाची चव वाढवते तसेच ओलावा शोषून घेण्यास मदत करते. जर मीठ किंवा साखरेच्या डब्यात ओलावा तयार होत असेल कापड्याच्या पुरचुंडीत लवंग बांधून ठेवल्यास त्यांना पाणी सुटणार नाही.