आजपर्यंत उच्च रक्तदान म्हणजे फक्त वृद्धांमध्ये दिसणारा आजार अशी समजूत होती. मात्र आता परिस्थिती बदलत असून किशोरवयीन मुलं आणि वीस-पंचविशीतल्या तरुणांनाही मोठ्या प्रमाणात उच्च रक्तदाबाच्या समस्येला सामोरं जावं लागतंय. ही चिंताजनक बाब असल्याचा इशारा डॉक्टरांनी दिला आहे.
डॉ. निशा कृष्णमूर्ती यांनी सांगितलं की, भारतात तरुणांमध्ये उच्च रक्तदाबाचं प्रमाण शांतपणे वाढतंय. अनेक तरुणांना स्वतःला ही समस्या आहे याची कल्पनाही नसते. त्यामुळेच उच्च रक्तदाबाला ‘सायलेंट किलर’ म्हटलं जातं.
डॉक्टरांच्या मते, बदलती जीवनशैली ही यामागची मोठी कारणं आहेत. आजची तरुण पिढी मोबाईल, लॅपटॉप आणि इतर स्क्रीनसमोर जास्त वेळ घालवते. रात्री उशिरापर्यंत जागरण, अपुरी झोप, व्यायामाचा अभाव आणि बैठी जीवनशैली यामुळे शरीरावर ताण वाढतो.
याशिवाय फास्ट फूड, जास्त मीठ असलेले पदार्थ, शुगर असलेले ड्रिंक्स आणि वेळेवर जेवण न करणं यामुळेही आरोग्यावर परिणाम होतोय. सततचा अभ्यासाचा ताण, करिअरची चिंता आणि सोशल मीडियाचा दबाव यामुळे मानसिक तणाव वाढतो आणि त्याचा थेट परिणाम रक्तदाबावर होतो.
या सर्व सवयींमुळे तरुणांमध्ये लठ्ठपणाचे प्रमाण वाढतंय. लठ्ठपणा हा उच्च रक्तदाबासाठी मोठा धोका मानला जातो. त्यामुळे कमी वयातच हृदय आणि किडनीशी संबंधित आजारांचा धोका निर्माण होऊ शकतो.
अनेक तरुणांना वाटतं की, जीवनशैलीशी संबंधित आजार त्यांना होऊ शकत नाहीत. त्यामुळे ते नियमित आरोग्य तपासणी आणि रक्तदाब तपासणे टाळतात. पण डॉक्टरांच्या मते, हीच सर्वात मोठी चूक ठरू शकते.
अनेक तरुण रुग्णांना रक्तदाब असल्याचे समजल्यावर धक्का बसतो, कारण हा आजार फक्त वयस्कर लोकांनाच होतो अशी त्यांची समज असते. मात्र आता परिस्थिती बदलली असून तरुणांनीही हृदयाच्या आरोग्याकडे गांभीर्याने पाहण्याची गरज आहे.
डॉक्टरांनी सांगितल की, कमी वयात सुरू झालेला अनियंत्रित उच्च रक्तदाब पुढे जाऊन हृदयविकार, स्ट्रोक, किडनीचे नुकसान आणि इतर गंभीर आजारांचे कारण ठरू शकतो. त्यामुळे वेळेत तपासणी आणि जीवनशैलीत बदल करणे खूप महत्त्वाचे आहे.
तज्ज्ञांच्या मते, दररोज किमान 30 मिनिटं व्यायाम करणं आवश्यक आहे. संतुलित आणि पौष्टिक आहार घ्यावा. जास्त मीठ असलेले आणि पॅकेज्ड पदार्थ कमी खावेत. पुरेशी झोप घेणं, ताण कमी करण्यासाठी श्वसनाचे व्यायाम करणं, चालणं, छंद जोपासणं आणि स्क्रीन टाइम कमी ठेवणंही गरजेचं आहे.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.