Stomach cancer: महिलांमध्ये लपलेली असतात पोटाच्या कॅन्सरची 'ही' लक्षणं; वेळीच लक्ष दिल्यास जीव वाचेल

• पोटाचा कॅन्सर सुरुवातीला ओळखणे कठीण

• महिलांमध्ये लक्षणांकडे दुर्लक्ष अधिक प्रमाणात

• सतत अपचन आणि वजन घट गंभीर संकेत

आजकाल जीवनशैलीतील अनेक घटकांमुळे आजाराचं प्रमाण वाढलं आहे. यामधील एक आजार म्हणजे कॅन्सर...पोटाच्या कॅन्सरची लक्षणे अनेकदा अस्पष्ट असतात किंवा इतर सामान्य आजारांसारखी वाटू शकतात. त्यामुळे सुरुवातीला त्याकडे दुर्लक्ष होण्याची शक्यता असते.

अनेकदा याची लक्षणं दिसत असून सुद्धा त्याकडे दुर्लक्ष केलं जातं. खासकरून हे प्रमाण महिलांमध्ये अधिक प्रमाणात दिसून येतं. पोटाच्या कॅन्सरची महिलांमध्ये कोणती लक्षणं दिसून येतात ती पाहूयात. जेणेकरून लवकर निदान होऊन लवकर उपचार होण्यास मदत होते.

सतत अपचन होणं

जर तुम्हाला वारंवार अपचनाचा त्रास होत असेल आणि तो सहज जात नसेल, तर हे लक्षण पोटाच्या कॅन्सरचं संकेत असू शकतं. अशा वेळी डॉक्टरांचा सल्ला घेणं आवश्यक आहे.

अचानक वजन कमी होणं

कोणतेही प्रयत्न न करता जर तुमचं वजन झपाट्याने कमी होत असेल तर हे शरीरात काही गंभीर घडामोडी सुरू असल्याचे संकेत आहेत. अशा स्थितीत वैद्यकीय तपासणी करणं गरजेचं आहे.

पोटात वेदना

पोटात सतत दुखणं किंवा अस्वस्थ वाटणं हेही एक महत्त्वाचं लक्षण आहे. जर हे दुखणं सतत राहत असेल आणि सामान्य औषधांनी कमी होत नसेल, तर त्याकडे दुर्लक्ष करू नये.

अन्न गिळताना अडचण येणं

जेवताना अन्न गिळण्यात अडचण येणं, घशात अडकणं किंवा गिळताना त्रास होणं हे पोटाच्या कॅन्सरचं संभाव्य लक्षण असू शकतं. अशा वेळी तात्काळ डॉक्टरांचा सल्ला घ्यावा.

सतत थकवा जाणवणं

जर तुम्हाला सतत थकवा जाणवत असेल आणि विश्रांती घेतल्यानंतरही तो कमी होत नसेल तर हे शरीरातील गंभीर आजाराचे संकेत असू शकतात. पोटाचा कॅन्सरही यामागे असू शकतो.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत