Ganpati Bappa 2025: उजवी की डावी? शास्त्रानुसार कोणत्या सोंडेचा गणपती बाप्पा घरी बसवणं असतं शुभ?

२७ ऑगस्ट २०२५ रोजी सर्वत्र गणेश चतुर्थी मोठ्या उत्साहात साजरी होणार आहे. लाडक्या गणरायाचे घरोघरी आगमन होणार आहे. हिंदू धर्मानुसार, गणपती बाप्पा आराध्य दैवत मानले जातात. याच गणरायाचे दर्शन घेताना तुम्ही काही गोष्टीची काळजी घेतली पाहिजे. गणपतीची सोंड ही उजवी आणि काहींमध्ये डावीकडे असते. प्रत्येक गणपतीचे विशेष महत्व असते. यानुसार आज आपण उजव्या आणि डाव्या सोंडेच्या गणपतीचे महत्व जाणून घेऊया.

गणपती बाप्पाच्या स्वरूपांविषयी अनेक रहस्य सांगितले जातात. गणपतीची अनेक रूपे आहेत. गणपतीच्या सोंडेची दिशा महत्वाची असते. गणपतीची सोंड एका बाजूला वळलेली असते त्याला वक्रतुंड म्हणतात. शास्त्रानुसार, डाव्या सोंडेचा गणपती घरात आणि ऑफिसमध्ये स्थापित करणे अधिक शुभ मानले जाते.

उजव्या सोंडेचा गणपती

गणपती बाप्पाची सोंड उजव्या दिशेला असते. उजव्या सोंडेचा गणपती याचा अर्थ दक्षिणाभिमुख मूर्ती असं मानलं जाते. दक्षिण याचा अर्थ असा की उजवी बाजू किंवा दक्षिण दिशा. ही दिशा यमलोकाकडे नेणारी, तर उजवी बाजू सूर्यनाडीची असते. यमलोकाच्या दिशेला तोंड देण्याची ताकद या गणपतीमध्ये असते. त्याची सूर्यनाडी असल्याने तेजस्वीही असतो. दक्षिणेला असलेल्या यमलोकात पाप- पुण्याचा लेखाजोखा केला जातो असं मानलं जातं त्यामुळे ही बाजू नकोशी असते असे सांगतात. उजव्या सोंडेचा गणपतीचे नियम देखील कडक असतात. या गणपतीची पूजा करताना मार्गदर्शन घेणे महत्वाचे असते.

डाव्या सोंडेचा गणपती

डाव्या सोंडेचा गणपती वाममुखी गणपती असेही म्हटले जाते. वाम यचा अर्थ डावी किंवा उत्तर बाजू. डावी बाजू ही उजव्या बाजूच्या विरूद्ध दिशेस असते. डाव्या बाजूला चंद्रनाडी असते ती शीतलता देते. उत्तर बाजू ही अध्यात्माला पूरक असते असे मानले जाते. त्यामुळेच वाममुखी गणपती पूजेसाठी शुभ मानला जातो. डाव्या गणपतीची पूजा नियमितपणे केली जाते.