Gallbladder Problems: 'ही' 4 लक्षणं दिसली तर समजा पित्ताशयात झालेत खडे; 99% लोकं करतात दुर्लक्ष

अनेकदा आपण पोटदुखीकडे सामान्य समस्या म्हणून पाहतो. मात्र तुम्हाला माहितीये का ही सामान्य समस्या तुमच्या जीवावर बेतू शकते. पोटाच्या वरच्या भागात अचानक तीव्र वेदना होऊन काही वेळात कमी होणं आणि पुन्हा-पुन्हा वेदना परत येणं हे पित्ताशयातील स्टोनचं म्हणजेच गॉलस्टोनचे संकेत असू शकतात.

तज्ज्ञांच्या म्हणण्यानुसार, ही समस्या विशेषतः महिलांमध्ये अधिक प्रमाणात दिसून येते. यावेळी अनेकदा याचं निदान उशिरा होतं. परिणामी उपचार घेण्यासही उशी होतो.

गॉलस्टोन म्हणजे नेमकं काय?

गॉलस्टोन म्हणजे गॉलब्लॅडरमध्ये तयार होणारे लहान कण असतात. हे कोलेस्ट्रॉल आणि बाइलच्या मिश्रणातून तयार होतात. ज्यावेळी हे कण पित्ताच्या मार्गात अडथळा निर्माण करतात त्यावेळी रूग्णाला पोटात तीव्र वेदना जाणवतात. ज्या पाठीकडे किंवा खांद्यापर्यंत पसरू शकतात.

काय दिसतात लक्षणं?

सुरुवातीला याची कोणतीही स्पष्ट लक्षण दिसून येत नाहीत. मात्र स्टोन वाढत गेल्यावर वेदना, मळमळ, उलटी आणि तेलकट अन्न खाल्ल्यानंतर अस्वस्थता जाणवणं असे त्रास रूग्णाला होऊ शकतात.

ही समस्या विशेषतः महिलांमध्ये, ४० वर्षांपेक्षा अधिक वयाच्या व्यक्तींमध्ये आणि लठ्ठपणाने ग्रस्त लोकांमध्ये अधिक प्रमाणात दिसून येते. वजन झपाट्याने कमी करणं हे या समस्येच्या जोखमीचे घटक ठरतात. काही वेळा ही स्थिती गंभीर रूप धारण करते, ज्याला ‘अक्यूट कोलेसिस्टायटिस’ म्हणतात. अशा वेळी गॉलब्लॅडर पूर्णपणे ब्लॉक होतो आणि रुग्णाला ताप, थंडी वाजणं आणि उलटीसारखी लक्षणे दिसतात. अशा परिस्थितीत तात्काळ डॉक्टरांचा सल्ला घेणे अत्यावश्यक असते.

जर या वेदना सौम्य असतील तर औषधोपचार आणि आहारातील बदलांमुळे आराम मिळण्याची शक्यता आहे. मात्र या वेदना वारंवार होत असल्यास डॉक्टर लॅप्रोस्कोपिक शस्त्रक्रियेद्वारे पित्ताशय काढून टाकण्याचा सल्ला देतात.

समस्येपासून कसा कराव बचाव?

गॉलस्टोनपासून बचाव करण्यासाठी तळलेलं आणि तेलकट पदार्थ कमी खाणं, वजन हळूहळू कमी करणं आणि रोज थोडा व्यायाम करणं फायदेशीर ठरते. शरीरातील पित्ताचे संतुलन राखण्यासाठी पुरेसं पाणी पिणं गरजेचं असल्याचं तज्ज्ञांचं मत आहे.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.