Silent Heart Attack: वारंवार ढेकर येतायेत, पोट फुगल्यासारखं वाटतंय? सावधान! हे गॅस नव्हे तर 'हार्टअटॅक'चे असू शकते लक्षण

छातीत जळजळ, ढेकर येणे किंवा पोट फुगल्यासारखं वाटणं या समस्या अनेकदा जाणवतात. म्हणून आपण त्यांना सहज दुर्लक्ष करतो. आपल्याला वाटतं, हा फक्त गॅस किंवा अपचनाचा त्रास आहे. मात्र डॉक्टरांच्या मते ही लक्षणं कधी कधी 'सायलेंट हार्ट अटॅक'चीही सुरुवाची लक्षणे असू शकतात.

दिल्लीतील मॅक्स सुपर स्पेशालिटी हॉस्पिटलचे वरिष्ठ हृदयरोग तज्ज्ञ डॉ. नवीन भामरी यांनी सांगितलं की, भारतामध्ये अनेक लोक छातीत किंवा वरच्या पोटात जाणवणारा दाब, जडपणा किंवा अस्वस्थता याला अपचन समजतात. पण काहीवेळा हीच लक्षणं हार्ट अटॅकची असू शकतात. अशा वेळी नेहमीसारखा जास्त छातीत दुखणं जाणवत नाही, त्यामुळे रुग्णांना ही गंभीर स्थिती ओळखता येत नाही.

जर तुम्हाला वारंवार छातीत कळा, वारंवार ढेकर, पोट फुगल्यासारखं वाटणं किंवा घशात जळजळ जाणवत असेल आणि हे लक्षणे पुन्हा पुन्हा होत असतील तर त्वरित डॉक्टरांचा सल्ला घ्या. हे 'सायलेंट' हार्ट अटॅकचे संकेत असू शकते. म्हणजे असा अटॅक जो वेदनेशिवाय वाढत जातो आणि गंभीर रुप धारण करतो. वृद्ध व्यक्ती आणि दीर्घकाळ उच्च रक्तदाब असलेले लोक या गटात येतात.

तज्ज्ञ सांगतात, हार्टबर्न आणि हार्ट अटॅकमध्ये फरक करणे काहीवेळा डॉक्टरांसाठीही कठीण ठरतं. दोन्ही आजारांमध्ये छातीत कळा, जळजळ किंवा ताण जाणवतो. जर ही वेदना जेवल्यानंतर किंवा झोपताना होते आणि अँटासिड घेतल्यावर कमी होते, तर ती बहुधा गॅसची असते. पण छातीत बराचवेळ अस्वस्थता, ताण किंवा जळजळ वाटत असेल आणि कारण समजत नसेल, तर त्याकडे दुर्लक्ष करू नये.

महिलांमध्ये हार्ट अटॅकची लक्षणं अनेकदा खुप हलकी सौम्य स्वरूपाची दिसतात. जसं की थकवा, मळमळ, पोटदुखी, छातीत दुखणे किंवा अस्वस्थता. कधी कधी ही वेदना हात, मान, तोंड किंवा पाठीकडेही पसरतात. तसेच श्वास घ्यायला त्रास, घाम येणे, किंवा चक्कर येणे ही देखील धोक्याची चिन्हं असू शकतात.