Kidney Disease Symptoms: डोळ्यातून पाणी अन् त्वचेत बदल जाणवतोय? असू शकतात किडनी फेल्युअरची लक्षणे, वाचा संपूर्ण माहिती

किडनी हा शरीरातला अत्यंत महत्त्वाची अवयव असतो. किडनीचे कार्य म्हणजे शरीरातील अपायकारक द्रव्ये, टॉक्सिन्स आणि अतिरिक्त पाणी बाहेर टाकणे. म्हणजेच शरीराच्या आतल्या भागात संतुलन राखण्याचे काम किडनी पार पाडत असते. मात्र जेव्हा किडनी आजारी पडते तेव्हा शरीरात टॉक्सिन्स साचायला सुरुवात होते. मग हळूहळू अनेक गंभीर आजार उद्भवतात. यामध्ये उच्च रक्तदाब, हृदयविकार आणि मधुमेहासारख्या आजारांचा धोका जास्त वाढतो.

ब्रिटनमधील हेल्थ वेबसाइट 'मेडिकल न्यूज टुडे'नुसार, क्रॉनिक किडनी डिसीजच्या सुरुवातीच्या टप्प्यात बऱ्याच वेळा लक्षणे दिसून येत नाहीत. मात्र, आजार वाढत गेल्यानंतर शरीरात अपायकारक घटक साचल्याने त्वचेवर आणि चेहऱ्यावर अनेक बदल दिसू लागतात. विशेषतः सकाळी उठल्यानंतर चेहऱ्यावर सूज, डोळ्यांभोवती पाणी साचल्यासारखे वाटणे, त्वचेचा रंग बदलणे किंवा ती कोरडी, खाज येणारी होणे हे संकेत किडनीच्या कार्यक्षमतेत बिघाड झाल्याचे सूचक असू शकतात.

किडनी नीट काम न केल्यास शरीरातील द्रव पदार्थ बाहेर न पडता जमा होतात आणि त्यामुळे फ्ल्यूड रिटेन्शन म्हणजेच एडिमा होतो. अशा स्थितीत चेहऱ्यावर सूज येणे, डोळ्यांखाली पिशव्या तयार होणे किंवा चेहऱ्याचा रंग फिकट पडणे हे लक्षणे सामान्य आहेत.

चेहरा किंवा डोळ्यांच्या खाली सूज दिसणे हे अनेकदा किडनी डॅमेजचे सुरुवातीचे संकेत असू शकतात. कारण, किडनी शरीरातील अपायकारक द्रव्ये आणि अतिरिक्त द्रव फिल्टर करण्याचे काम करते. जेव्हा ती क्षमता कमी होते तेव्हा शरीरात पाणी साचते आणि सूज दिसते. त्याचप्रमाणे किडनी खराब झाल्यास शरीरात विषारी पदार्थ साचल्याने त्वचा कोरडी पडते, खाज येते आणि तजेला कमी होतो.

टिप

डॉक्टरांच्या सल्ल्याशिवाय स्वतःहून उपचार करू नका. किडनीच्या आजारात जास्त पाणी पिणेही काहीवेळा धोकादायक ठरू शकते. त्यामुळे पाण्याचे सेवन आणि आहार डॉक्टरांच्या सल्ल्यानुसारच ठरवा. योग्य वेळी उपचार घेतल्यास किडनीचे कार्य सुरळीत राहू शकते आणि गंभीर परिणाम टाळता येतात.