Diabetes Diet : डायबिटीजवर रामबाण उपाय, भात-पोळीऐवजी खा 'हे' पदार्थ; रक्तातील साखर होईल झटक्यात कमी

डायबिटीजचं निदान झाल्यानंतर सर्वात आधी आहाराकडे लक्ष देण्याचा सल्ला दिला जातो. रक्तातील साखर नियंत्रणात ठेवण्यासाठी अनेकजण आपल्या जेवणातून भात आणि गहू पूर्णपणे कमी करतात. काहीजण तर भात खाणंच बंद करतात. मात्र, मधुमेह झाल्यानंतर भात आणि पोळी खाणं खरंच बंद करायला हवं का? याचं उत्तर AIIMS दिल्लीच्या एका डॉक्टरांनी दिलं आहे.

डॉक्टरांच्या मते, मधुमेह असलेल्या रुग्णांसाठी मिलेट्स म्हणजेच भरड धान्यांचा आहारात समावेश करणं फायदेशीर ठरू शकतं. बाजरी, ज्वारी आणि नाचणी यांसारख्या धान्यांमध्ये फायबरचं प्रमाण चांगलं असतं. त्यामुळे अन्न पचण्याची प्रक्रिया हळू होते. परिणामी, अन्नातील कर्बोदकं हळूहळू शरीरात शोषली जातात आणि रक्तातील साखर अचानक वाढण्याचा धोका कमी होण्यास मदत होते.

मिलेट्सचा वापर रोजच्या जेवणात सहज करता येतो. बाजरी आणि ज्वारीच्या भाकरी खाता येतात. नाचणीच्या पिठापासून भाकरी, धिरडं तयार करता येतो. या धान्यांमधून शरीराला फायबरसोबतच आवश्यक पोषक घटकही मिळतात. मात्र, कोणतं धान्य किती प्रमाणात खायचं, हे व्यक्तीची प्रकृती आणि आहाराच्या गरजेनुसार ठरवणं महत्त्वाचं आहे.

मधुमेह झाला म्हणजे भात आणि गहू खाणं कायमचं बंद करावं, असं नाही. उलट जेवणात कोणता पदार्थ किती प्रमाणात घेतला जातो, याकडे लक्ष देणं गरजेचं आहे. पांढऱ्या भाताचं प्रमाण कमी करून त्याऐवजी काही प्रमाणात भरड धान्यांचा वापर करता येतो. तसेच गव्हाच्या पिठात ज्वारी, बाजरी किंवा नाचणीचं पीठ मिसळून पोळ्या तयार करता येतात. त्यामुळे मधुमेहाच्या रुग्णांनी कोणताही पदार्थ अचानक बंद करण्याऐवजी संतुलित आहारावर भर द्यावा. आहारात बदल करण्यापूर्वी डॉक्टर किंवा आहारतज्ज्ञांचा सल्ला घेणं अधिक योग्य ठरतं.