Blood Sugar : गोड पदार्थ खाणं बंद करूनही रक्तातील साखर वाढतेय? रोजच्या 'या' ५ सवयी ठरतायत जीवघेण्या

मधुमेह असलेल्या व्यक्तींना रक्तातील साखर नियंत्रणात ठेवण्यासाठी आहाराची विशेष काळजी घ्यावी लागते. अनेक जण गोड पदार्थ खाणं बंद करतात, औषधं वेळेवर घेतात आणि खाण्यापिण्यात बदल करतात. तरीही काही वेळा रक्तातील साखरेची पातळी वाढलेली दिसते. यामागे केवळ गोड पदार्थ कारणीभूत नसतात, तर रोजच्या जीवनातील काही सवयीही याला कारणीभूत ठरू शकतात.

जास्त भात आणि पोळी खाणं

भात, पोळी, ब्रेड, बटाटा यांसारख्या पदार्थांमध्ये साखरेचं प्रमाण जास्त असतं. हे पदार्थ जास्त प्रमाणात खाल्ल्यास रक्तातील साखर वाढू शकते. त्यामुळे आहारातून हे पदार्थ पूर्णपणे बंद करण्याऐवजी योग्य प्रमाणात खाणं महत्त्वाचं आहे.

दिवसभर एकाच जागी बसून राहणं

ऑफिसमध्ये किंवा घरी अनेक तास बसून काम केल्याने शारीरिक हालचाल कमी होते. याचा परिणाम शरीरातील साखरेचा वापर होण्यावर होतो. त्यामुळे कामाच्या मध्ये थोडं चालणं किंवा हलका व्यायाम करणं फायदेशीर ठरतं.

पुरेशी झोप न घेणं

रोज पुरेशी झोप न मिळाल्यास शरीराच्या कामकाजावर परिणाम होतो. त्यामुळे इन्सुलिनची कार्यक्षमता कमी होऊन रक्तातील साखर वाढू शकते.

सतत तणावात राहणं

कामाचा ताण, चिंता आणि मानसिक अस्वस्थता यांचाही रक्तातील साखरेवर परिणाम होऊ शकतो. त्यामुळे स्वतःसाठी थोडा वेळ काढणं आणि मन शांत ठेवणं गरजेचं आहे.

शरीरात पाणी कमी होणं

पुरेसं पाणी न प्यायल्यास शरीरात पाण्याची कमतरता निर्माण होते. त्यामुळे रक्तातील साखरेचं प्रमाण अधिक दिसू शकतं. याशिवाय हार्मोन्समधील बदल, ताप, संसर्ग आणि काही औषधांमुळेही रक्तातील साखर वाढू शकते.

मधुमेह नियंत्रणात ठेवण्यासाठी काय कराल?

संतुलित आहार घ्या, नियमित व्यायाम करा, पुरेशी झोप घ्या आणि दिवसभर सक्रिय राहा. रक्तातील साखर वारंवार वाढत असल्यास डॉक्टरांचा सल्ला घ्या. स्वतःहून औषधं बंद करू नका किंवा त्यांचा डोस बदलू नका. योग्य आहार आणि निरोगी जीवनशैलीच्या मदतीने मधुमेह नियंत्रणात ठेवण्यास मदत होऊ शकते.