Monsoon Special Recipes : जेवणासोबत तोंडी लावायला बेस्ट ऑप्शन! घरीच बनवा दही मिरची, जाणून घ्या रेसिपी

पावसात आपल्याला अनेक चटपटीत गरमागरम पदार्थ खायला आवडतात. वरण, भात, भाजी, पोळी अशी पारंपरिक थाळी असली तरी याची चव वाढवण्यासाठी आपण चटणी, कोशिंबीर, लोणचे इत्यादी पदार्थ खातो. हे पदार्थ तोंडी लावायला चवदार लागतात.

पावसाळ्यात जेवणासोबत तोंडी लावायला बेस्ट ऑप्शन म्हणजे चटपटीत कुरकुरीत दही मिरची होय. या मिरचीची पाकीटे बाजारात मोठ्या प्रमाणात मिळतात. पण पावसात बाहेरचे पदार्थ खाण्यापेक्षा घरीच बनवा साध्या सोप्या पद्धतीने दही मिरची. यामुळे जेवणाची मजा अजून खुलेल.

साहित्य

चटपटीत दही मिरची बनवण्यासाठी खालील गोष्टी लागतात.

• हिरव्या मिरच्या

• आंबट दही

• धने-जिरे पूड

• हिंग

• हळद

• दाण्याचा कूट

• मीठ

• लसूण

कृती

पावसाळ्यात चटपटीत दही मिरची बनवण्यासाठी सर्वप्रथम हिरव्या मिरच्या स्वच्छ धूवून उभ्या कापाव्यात. दही मिरची बनवण्यासाठी जास्त तिखट मिरची घेणे टाळावे. दही मिरची बनवण्यासाठी घट्ट आंबट दह्याचा वापर करावा. एका भांड्यात दही, मीठ, हिंग, हळद, धने- जिरे पूड, दाण्याचा कूट, बारीक चिरलेली लसूण घालून सर्व मिश्रण चांगल फेटून घ्यावे. मिरचीला चारी बाजूंनी सारण लागेल याची काळजी घ्यावी. हे मिश्रण रात्रभर तसेच ठेवून द्या. मिरचीमध्ये दही छान मुरू द्या. त्यानंतर या मिरच्या उन्हामध्ये किंवा पंख्याखाली वाळवायला ठेवा. त्यासाठी तुम्ही एका प्लेटमध्ये प्लास्टिक पसरवून त्यावर हे सारण वाळवायला टाका. मिरची संपूर्ण वाळल्यावर तुम्ही हवाबंद डब्यामध्ये ठेवून द्या. जेव्हा मिरच्या खायच्या असतील तेव्हा मंद आचेवर गरम तेलात छान कुरकुरीत होईपर्यंत तळून घ्या. अशाप्रकारे जेवणात तोंडी लावायला दही मिरची तयार झाली. या पद्धतीने बनवलेली दही मिरची वर्षभर टिकते.