Konkan Railway : मुसळधार पावसाचा कोकण रेल्वेला फटका; सेवा ठप्प, प्रवाशांचा खोळंबा

गोवा येथील पेडणे बोगद्यात रेल्वे रूळावर पाणी येत असल्याने कोकण रेल्वे सेवा ठप्प झाली आहे.

कोकण रेल्वे सेवा ठप्प झाल्याने अनेक गाड्या रद्द करण्यात आल्या आहेत. त्यामुळे प्रवाशांना मोठा फटका बसला आहे.

गोव्याच्या दिशेने जाणाऱ्या लोकमान्य टिळक टर्मिनस, कोच्चिवली एक्स्प्रेस, नेत्रावती एक्स्प्रेस या गाड्या सिंधुदुर्ग जिल्ह्यात सावंतवाडी आणि सिंधुदुर्ग या रेल्वे स्थानकावरून मुंबईच्या दिशेने निघाल्या आहेत.

मुंबईवरून येणाऱ्या कोकणकन्या आणि तुतारी या गाड्या सावंतवाडी स्थानकातून परतीच्या प्रवासाला निघतील. कालपासून गोवा पेडणे बोगद्यात भूगर्भातून पाणी व माती रूळावर येत असल्यामुळे कोकण रेल्वे ठप्प झाली आहे.

मंगळवारी सायंकाळी बोगद्यात रूळावर पाणी आणि माती आली. त्यानंतर रेल्वे सेवा ठप्प झाली.

गोवा येथील पेडणे बोगद्यात गेल्या काही तासांपासून मजूर बोगद्यात आलेले पाणी आणि चिखल बाहेर काढण्याचा प्रयत्न करीत आहेत.

बोगद्यातील पाणी आणि चिखल बाहेर काढण्याच्या कामामुळे अनेक गाड्या रद्द करण्यात आल्या आहेत. याचा मोठा फटका प्रवाशांना बसला आहे.