फ्रान्सची राजधानी पॅरिस मध्ये महाराष्ट्रातील शेतकऱ्यांनी शिवरायांची 396 वी जयंती साजरी केली. सातासमुद्रपार छत्रपती शिवाजी महाराजांचा डंका आहे. राज्यातील 55 शेतकरी शेतीविषयक अभ्यासासाठी युरोप दौऱ्यावर आहेत. 15 दिवसांचा हा दौरा आहे. राज्य शासनाच्या कृषी विभागातर्फे हा दौरा आयोजित करण्यात आला आहे.
शेतकरी कोणता अभ्यास करणार ?
युरोपातील देशांमधील कृषी विषयक तंत्रज्ञानाची माहिती घेतली जात आहे. आधुनिक तंत्रज्ञानावर आधारित बकरी पालन आणि त्यावर चीज प्रक्रिया याचा अभ्यास केला जाणार आहे. त्याशिवाय उसाचे चिपाट आणि कचरा यापासून मिथेन गॅस निर्मिती प्रकल्पांची पाहणी करुन सविस्तर माहिती घेतली जाणार आहे.
अतिरिक्त ऊस आणि त्याच्या वेस्टेजचा म्हणजेच टाकाऊ गोष्टींचा कसा वापर करता येईल, याचा अभ्यास महाराष्ट्रातील शेतकरी करणार आहेत. मॉडर्न वायनरी यार्ड आणि प्रक्रिया युनिट शेतकऱ्यांनी पाहिलं आहे. Paris agriculture visit
या सगळ्या अभ्यासाचा, निरीक्षणाचा महाराष्ट्रात उपयोग व्हावा तसेच चांगल्या बाबींची अंमलबजावणी शेतकऱ्यांनी आपल्या तालुक्यात करावी हा उद्देश या दौऱ्यामागचा आहे, अशी माहीती दौऱ्यात सहभागी झालेले शहापुरचे बबन हारणे यांनी साम टीव्हीशी संवाद साधताना दिली. राज्यातील प्रगतीशील शेतक-यांचा या अभ्यास दौऱ्यात समावेश आहे.