'टप्पू'नेही सोडला 'तारक मेहता का उल्टा चष्मा'? बऱ्याच दिवसांपासून शूटिंगला आलाच नाही

मुंबई: टीव्हीवरील लोकप्रिय मालिका तारक मेहता का उल्टा चष्मा गेल्या(TMKOC) अनेक दिवसांपासून सातत्याने चर्चेत आहे. दिशा वाकानी, नेहा मेहता, शैलेश लोढा यांच्यानंतर आता 'टप्पू'ची भूमिका साकारणारा राज अनडकट (Raj Anadkat) देखील या मालिकेतून 'एक्झिट' घेणार असल्याची चर्चा टीव्ही इंडस्ट्रीत सुरू आहे. गेल्या अनेक दिवसांपासून राज अनडकट या शोचे शूटिंग करत नाहीये. हा खुलासा शोमध्ये भिडेची भूमिका साकारणाऱ्या मंदार चांदवडकर याने केला असून, राज काही काळ सेटवर गैरहजर असल्याचे त्याने सांगितले आहे. त्याची तब्येत ठीक नसल्यामुळे गेल्या अनेक दिवसांपासून तो सेटवर येत नसल्याचे मंदार चांदवडकर म्हणाला.

मंदार चांदवडकर याने एका मुलाखतीत सांगितले की, 'एक कलाकार म्हणून त्याने शो सोडला आहे की नाही हे आम्हाला माहीत नाही; परंतु तो काही दिवसांपूर्वी आजारी होता. ज्यामुळे तो गेल्या काही दिवसांपासून शूटिंग करत नव्हता. मी त्याला अजून सेटवर पाहिलेले नाही'. २०१७ साली शोमध्ये भव्य गांधींच्या जागी राज हा 'टप्पू'ची भूमिका साकारत आहे.

राज अनडकट सध्या त्याच्या आई आणि बहिणीसोबत दुबईत सुट्टी घालवत आहेत. तो त्याच्या इंस्टाग्राम अकाऊंटवरून चाहत्यांसाठी त्याच्या व्हेकेशनचे फोटो शेअर करत आहे. याचवेळी, राजने नुकतेच रणवीर सिंगसोबतचे दोन फोटो शेअर केले आहेत. याच बरोबर त्याने या फोटोच्या कॅप्शनमध्ये लिहिले की तो रणवीर सिंगसोबत लवकरच मोठ्या प्रोजेक्टमध्ये दिसणार आहे.

काही दिवसांपूर्वी शैलेश लोढा उर्फ ​​तारक मेहतानेही या शोचा निरोप घेतला. शैलेश लोढा 'तारक मेहता का उल्टा चष्मा'चा १४ वर्षे भाग होता. त्याने शो सोडल्यानंतर त्याविषयी प्रतिक्रिया देण्यास नकार दिला आहे.