Tunisha Sharma Case: तुनिषा शर्मा आत्महत्या प्रकरणात शीझान खानच्या अडचणीत वाढ, हायकोर्टाने गुन्हा रद्द करण्यास दिला नकार

Tunisha Sharma Suicide Case:

टीव्ही अभिनेत्री तुनिषा शर्माने (Tunisha Sharma) गेल्या वर्षी २०२२ मध्ये गळफास लावून आत्महत्या केली होती. अभिनेत्रीच्या निधनाच्या बातमीनंतर टीव्ही इंडस्ट्रीत शोककळा पसरली होती. या प्रकरणी तुनिषाच्या आत्महत्येला तिचा बॉयफ्रेंड शीझान खान (sheezan khan) जबाबदार असल्याचा गंभीर आरोप करण्यात आला होता.

याप्रकरणी तुनिषाच्या आईने शीझानविरोधात गुन्हा दाखल केला होता. तुनिषाच्या आत्महत्येप्रकरणी शीझानला अटक देखील झाली होती. ७० दिवस तुरुंगात राहिल्यानंतर त्याला जामीन मिळाला. पण याप्रकरणी शीझानच्या अडचणी काही कमी झाल्या नाहीत.

तुरुंगातून बाहेर आल्यानंतर शिझानने तुनिषा शर्माच्या आत्महत्येप्रकरणी त्याच्यावर केलेले सर्व आरोप खोटे असल्याचे सांगत हायकोर्टात धाव घेतली होती. त्याने हायकोर्टात याचिका दाखल करत तुनिषाच्या आत्महत्येप्रकरणी दाखल केलेला गुन्हा रद्द करण्याची मागणी केली. पण हायकोर्टाने त्याची ही याचिका फेटाळून लावली. त्यामुळे शीझानला मोठा झटका बसला आहे.

रिपोर्ट्सनुसार, शीझान खान आणि तुनिषा शर्मा रिलेशनशिपमध्ये होते. पण नंतर त्यांचे ब्रेकअप झाले. तुनिषाच्या आईने शीझानवर आपल्या मुलीची फसवणूक करणे, तिला हिजाब घालणे आणि उर्दू शिकण्यास भाग पाडल्याचे गंभीर आरोप केले आहेत. तुनिषा शर्माच्या आत्महत्येच्या १५ दिवस आधी तिचा शीझानसोबत ब्रेकअप झाला होता. शीझान खानने पोलिसांना सांगितले की, तुनिषासोबत त्याचे तीन महिने नातं होतं.

दरम्यान, शीझान खान 'खतरो के खिलाडी १३ मध्ये सहभागी झाला होता. या रियालिटी शोमध्ये सहभागी होण्यापूर्वी शीझानने तुनिषासोबत 'अली बाबा: दास्तान-ए-काबुल' या मालिकेत एकत्र काम केले होते. या मालिकेच्या सेटवरच दोघांची मैत्री त्यानंतर प्रेम झालं. दोघेही अनेक ठिकाणी एकत्र स्पॉट व्हायचे. सध्या तुनिषा आत्महत्या प्रकरणाचा तपास मुंबई पोलिसांकडून सुरू आहे.