Jui Gadkari : "रस्ते नाहीत, खूप त्रास झालाय..."; मढ आयलँडची भीषण परिस्थिती पाहून जुई गडकरी भडकली, पाहा VIDEO

संजय गडदे, साम टीव्ही प्रतिनिधी

अनेक कलाकार कायम सामाजिक प्रश्नांवर बोलताना दिसतात. कधी पाणी असो, कधी स्वच्छता असो , कधी वाहतूक तर कधी पावसाळा रोजच्या जीवनात प्रवास करताना अनेक संकटांना सामोर जावे लागते. त्यातील सर्वात महत्त्वाचे संकट म्हणजे वाहतूक कोंडी... आता यासंबंधितच मराठी अभिनेत्री जुई गडकरी हिने सोशल मीडियावर पोस्ट शेअर करून आपला संताप व्यक्त केल आहे.

मढ आयलँड परिसरातील रस्त्यांची दुरवस्था आणि प्रचंड वाहतूक कोंडीवर मराठी टिव्ही अभिनेत्री जुई गडकरी हिने तीव्र संताप व्यक्त केला आहे. जुई गडकरीने इंस्टाग्राम या सोशल मीडियावर व्हिडिओ शेअर करत रस्त्यांमधील खड्डे, धुळीचे साम्राज्य आणि अपुऱ्या वाहतूक व्यवस्थेवर प्रश्नचिन्ह उपस्थित केले आहेत. या खराब रस्त्यांमुळे स्थानिक नागरिकांसह कलाकारांनाही रोजच्या प्रवासात मोठ्या अडचणींना सामोरे जावे लागत असल्याचे तिने व्हिडिओत म्हटले आहे.

"मढ सारख्या भागाकडे प्रशासनाचे लक्षच नाही का?" असा थेट सवाल जुई गडकरीने केला आहे. तिचा हा व्हिडिओ सोशल मीडियावर व्हायरल होत असून अनेक नागरिकांनीही तिच्या संतापाला दुजोरा दिला आहे. तिच्या या व्हिडीओवर नेटकरी आणि कलाकार मंडळी कमेंट करताना दिसत आहेत.

जुई गडकरी पोस्ट

जुई गडकरीने पोस्टमध्ये म्हटल्यानुसार, जुई गडकरी साडेतीन वर्षे मड आयलँडमध्ये शूट करते आहे. येथे कुठल्याच सुविधा नाहीत. ती ज्या एरियातून येते. तो डिफेन्स एरिया आहे तरी त्याच्या सुरक्षिततेकडे दुर्लक्ष केले आहे. गेली साडेतीन वर्ष तेथे रस्त्याचे काम सुरू आहे. काम अगदी आरामात सुरू आहे. रोज नवीन खड्डे, रोज नवीन त्रास असल्याचे जुईने म्हटले आहे. येथे प्रचंड ट्रॅफिक लागते. मढमधून बाहेर पडायला कधी कधी दोन तास लागतात.

शेवटी जुई गडकरी म्हणते की, "टॅक्स वेळेत भरा, सगळ्या गोष्टी नीट पाळा. कुठल्याही नियमांचे उल्लंघन न करूनही जर अशी व्यवस्था असेल, तर सामान्य माणसाने नक्की काय करायचे ?" १० किलोमीटरचा रस्ता करायला साडेतीन वर्षं लागतात? असा प्रश्न जुईने केला आहे. जुई गडकरी पोस्टच्या शेवटी देवेंद्र फडणवीस, एकनाथ शिंदे, नितीन गडकरी, सुनेत्रा पवार, श्रीकांत शिंदे यांना टॅग करत मदत मागितली आहे.