Gurucharan Singh News : 'तारक मेहता...' फेम गुरूचरण सिंह २५ दिवस कुठे होता ? महिन्यानंतर अभिनेत्याने सांगितलं खरं कारण

‘तारक मेहता का उल्टा चश्मा’ फेम गुरूचरण सिंह सोढी एप्रिल महिन्यामध्ये २५ दिवस बेपत्ता झाला होता. त्यानंतर तो घरी परतला. ते २५ दिवस अभिनेता नेमका कुठे होता ? हा प्रश्न सर्वांनाच पडला होता. अभिनेता त्यावेळी गुरूद्वारेत सेवा करण्यासाठी आणि आध्यात्मिक प्रवासासाठी गेलो असं त्याने स्वत: सांगितले होते. कोणत्या कारणांनी आपण हे पाऊल उचलले या प्रश्नावर गुरुचरण सिंहने उत्तर दिले आहे.

अभिनेता बेपत्ता झाल्यानंतर सोशल मीडियावर तो आर्थिक अडचणींमुळे गायब झाल्याची चर्चा झाली होती. अशा अनेक उलट सुलट चर्चा सोशल मीडियावर झाल्या होत्या. बेपत्ता होण्याच्या चर्चांवर अभिनेत्याने उत्तर दिले आहे.

गुरूचरण सिंह सोढीने सांगितले की, "मी बेपत्ता होण्याचं कारण कर्जबाजारी किंवा कर्ज फेडू शकत नाही असं नाही. कर्जाचं ओझं माझ्यावर आजही आहे. माझा हेतू चांगला आहे. त्याशिवाय मी कर्ज घेतलं असलं तरीही क्रेडिट कार्ड आणि ईएमआयचा हफ्ता भरत आहे. मी गेल्या ४ वर्षांपासून नवीन कामाच्या शोधात आहे, पण मला सर्वच ठिकाणी नकारच मिळत होता."

अभिनेत्याने बेपत्ता होण्याचे कारण सांगताना पुढे सांगितले की, "मी २५ दिवस अज्ञात स्थळी घालवल्यानंतर आणि एका ठिकाणाहून दुसर्‍या ठिकाणी गेल्यानंतर, मी आता एक व्यक्ती म्हणून बदललो आहे. मी २५ दिवसात सगळं जग पाहिले आहे. २५ दिवस मी एका आध्यात्मिक प्रवासासाठी गेलो होतो. यामध्ये मी कोणताही पब्लिसिटी स्टंट केलेला नाही. मला पूर्वी हे शब्द सुद्धा माहिती नव्हते. जो पर्यंत पैशांचा प्रश्न आहे, तोपर्यंत मी अनेक मोठ मोठे निर्णय घेतले आहेत.

इतकं सर्व आलबेल सुरू असताना, तुम्ही पळून जाण्याचा का विचार केला ? असा प्रश्न गुरूचरणला विचारण्यात आला होता. आपल्या जवळच्या लोकांमुळे मनाला वेदना झाल्यामुळे मी पळून जाण्याचा निर्णय घेतला होता. असं गुरुचरण सिंहने सांगितले. "आयुष्यात असे काही दिवस येतात, जे तुम्ही तुमच्या कुटुंबापासून आणि जगापासून दूर जाता. नोकरी मिळवण्याचा प्रयत्न करूनही मी माझ्या जवळच्या लोकांवर नाराज होतो. मला सतत नकाराचा सामना करावा लागत होता. मला माहीत होते की काहीही झाले तरी मी आत्महत्येचा विचार करणार नाही." असं अभिनेत्याने २५ दिवस कुटुंबापासून अज्ञातस्थळी जाण्यामागचे कारण सांगितले.