Gadar 2 Trailer Out: २२ वर्षांनंतरही ‘गदर’ची क्रेझ कायम, सनी देओलच्या ‘गदर २’चा ट्रेलर प्रदर्शित; दिसणार ॲक्शन आणि दमदार संवादांचा जलवा

Sunny Deol, Ameesha Patel Gadar 2 Trailer Out: अनिल शर्मा दिग्दर्शित ‘गदर २’ची सध्या प्रेक्षकांमध्ये एक वेगळीच क्रेझ असून या मोस्टअवेटेड चित्रपटाचा ट्रेलर प्रेक्षकांच्या भेटीला आला आहे. सनी देओल आणि अमिशा पटेल प्रमुख भूमिकेत असलेल्या ‘गदर २’ची घोषणा झाल्यापासून प्रेक्षकांना चित्रपटाबद्दल खूपच उत्सुकता आहे.

टीझर, गाणी आणि आता या चित्रपटाचा ट्रेलर प्रेक्षकांच्या भेटीला आला आहे. ‘गदर २’ चा ट्रेलर २६ जुलै रोजी अर्थात काल डिजिटल रूपात ट्रेलर प्रदर्शित झाला आहे. ट्रेलरमध्ये प्रेक्षकांना पुन्हा एकदा सनी देओलच्या ॲक्शन सीन्सचा जलवा पाहता येणार आहे.

ट्रेलरने युट्यूबवर अवघ्या काही वेळातच उत्तम व्ह्यूज मिळवले. पुन्हा एकदा प्रेक्षकांना ‘गदर २’च्या माध्यमातून उत्तम कथा, अंगावर रोमांच उभे करणारे संवाद आणि वैविध्यपूर्ण अभिनयाच्या जोरावर प्रेक्षकांना ‘गदर २’ पाहण्याची उत्सुकता शिगेला पोहोचली. चित्रपट येत्या ११ ऑगस्टला प्रदर्शित होणार आहे. ‘गदर २’चा ट्रेलर झी स्टुडिओजने सोशल मीडियावर शेअर केला आहे.

ट्रेलरच्या सुरूवातीला, काही पाकिस्तानी लोकं ‘अगला जुम्मा दिल्ली मै...’ असं म्हणताना दिसत आहे. त्यानंतर तारा सिंह बॉर्डरवरील दोन्ही देशाच्या सैन्यासोबत दोन हात करताना दिसत आहे. चित्रपटाच्या फ्लॅशबॅकमध्ये सकीना आणि तारा त्यांच्या मुलांसोबत आनंदाने आणि गुण्या गोविंदाने आपले आयुष्य जगताना दिसत आहेत.

ट्रेलरमध्ये, एक दिवस तारा सिंहचा मुलाला पाकिस्तानची आर्मी त्याला कैद करते. नेमका त्याला पाकिस्तानात कोणत्या कारणासाठी कैद केलं हे प्रेक्षकांना चित्रपट पाहिल्यावरच समजेल. तारा सिंह आपल्या मुलाची पाकिस्तानी सैन्याच्या तावडीतून सुटका कशा प्रकारे करतो, हे आपल्याला चित्रपट पाहिल्यावरच कळेल. पाकिस्तानी आर्मीच्या तावडीतून आपल्या मुलाची सुटका करताना त्याचा ॲक्शन अवतार पाहून प्रेक्षकांना चित्रपटाची उत्सुकता लागली. (Bollywood Film)

गदरचा पहिला भाग तब्बल २२ वर्षांपूर्वी प्रेक्षकांच्या भेटीला आला होता. २००१ मध्ये प्रदर्शित झालेल्या ‘गदर: एक प्रेमकथा’चे दिग्दर्शन अनिल शर्मा यांनी केले होते. सनी देओल, अमिषा पटेल, अमरीश पुरी, लिलेट दुबे यांनी या चित्रपटात प्रमुख भूमिका साकारल्या होत्या.

फाळणीवर आधारित असलेल्या चित्रपटात अमिशा पटेलने सकीना तर सनी देओलने तारा सिंहच कॅरेक्टर रंगवलंय. अमरिश पुरी आणि सनी देओल यांच्या डायलॉगमुळे चित्रपटाने प्रेक्षकांच्या मनात घर निर्माण केले.

‘गदर २’मध्ये प्रमुख भूमिकेत सनी देओल, अमिशा पटेल, उत्कर्ष शर्मा आणि सिमरत कौर हे सेलिब्रिटी दिसत आहे. चित्रपट येत्या ११ ऑगस्टला प्रदर्शित होणार आहे.