Badshah Divorce : बॉलीवूडमध्ये पुन्हा खळबळ! 'या' प्रसिद्ध रॅपरने घेतला ५ महिन्यातच घटस्फोट; ईशा रिखीसोबत नाते संपले

सिने इंडस्ट्रीतील ब्रेकअप पॅचअपच्या घटना आपल्याला सतत ऐकायला मिळतात. अशातच आता भारतीय मनोरंजनसृष्टीत खळबळ उडवणारी बातमी समोर आली आहे. प्रसिद्ध गायक आणि रॅपर बादशाह आणि त्याची पत्नी ईशा रिखी यांचा घटस्फोट झाला आहे. विशेष म्हणजे, या दोघांनी मार्च २०२६ मध्येच जवळच्या नातेवाईक आणि मित्रांच्या उपस्थितीत खासगी पद्धतीने लग्न केलं होतं. लग्नाला अवघे पाच महिने होत असतानाच त्यांच्या घटस्फोटाची बातमी समोर आल्याने चाहत्यांना मोठा धक्का बसला आहे.

बादशाह आणि ईशा रिखी यांनी आपल्या इन्स्टाग्राम स्टोरीजवर पोस्ट शेअर करत घटस्फोटाची माहिती दिली आहे. बादशाहने आपल्या पोस्टमध्ये म्हटलं की, “मी आणि ईशा रिखीने परस्पर संमतीने घटस्फोट घेण्याचा आणि आपापल्या मार्गाने पुढे जाण्याचा निर्णय घेतला आहे. हा निर्णय परस्पर घेण्यात आला असून या काळात आमच्या गोपनीयतेचा आदर करावा, अशी कळकळीची विनंती आम्ही सर्वांना करतो.”

ईशा रिखीने यापूर्वी जून महिन्यात इन्स्टाग्रामवरील ‘आस्क मी एनीथिंग’ सेशनदरम्यान बादशाहसोबतच्या लग्नाबद्दल आणि त्यांच्या प्रेमाबद्दल चाहत्यांशी गप्पा केल्या. त्यानंतर काहीच महिन्यांत दोघांच्या घटस्फोटाची बातमी समोर आली आहे. जुलैपासूनच त्यांच्या नात्यात दुरावा निर्माण झाल्याच्या चर्चा सुरू होत्या. ईशाची आई पूनम रिखी यांनीही अलीकडे ‘कर्म’ या विषयावर काही पोस्ट शेअर केल्याने सोशल मीडियावर विविध चर्चा रंगल्या होत्या.

दरम्यान, ईशा रिखी ‘बिग बॉस २०’ मध्ये सहभागी होऊ शकते, अशा चर्चाही सुरू आहेत. बादशाहचं हे दुसरं लग्न होतं. यापूर्वी त्याचं लग्न जस्मिन मसीहसोबत झालं होतं. दोघांचा २०२० मध्ये घटस्फोट झाला. त्यांना जेसामी ग्रेस मसीह सिंग नावाची मुलगी आहे. बादशाह आणि ईशाची भेट एका कॉमन मित्राच्या पार्टीत झाली होती. त्यानंतर दोघांमध्ये जवळीक वाढली आणि ते एकमेकांना डेट करू लागले. मात्र, त्यांनी अनेक वर्षे आपलं नातं रिव्हिल केलं नव्हतं. २०२३ मध्ये त्यांच्या लग्नाच्या अफवा पसरल्या होत्या, मात्र त्यावेळी बादशाहने त्या फेटाळून लावल्या होत्या. दरम्यान बादशाह सध्या चर्चेत असून, नुकतंच त्याचं पहिलं मराठी गाणंही रिलीज झालं आहे.