Shahrukh Khan: नववर्षाच्या सुरूवातीलाच दिल्लीमधील भीषण अपघाताच्या घटनेने संपूर्ण देशभरात खळबळ माजली होती. दिल्लीच्या कंझावाला भागात बलेनो कारने तरुणीला तब्बल १३ किमी फरफटत नेले होते. ज्यामध्ये अंजलीचा जागीच मृत्यू झाला. अपघातात मृत्यू पावलेली मुलगी घरातील एकमेव कमावती होती. तिच्या घरात आजारी आई आणि दोन भावांची जबाबदारी तिच्यावर होती. (Delhi Car Accident)
या भीषण अपघातात तरुणीला जीव गमवावा लागल्याने देशभरात हळहळ व्यक्त केली जात असतानाच बॉलिवूडचा किंग शाहरुख खान या मुलीच्या कुटूंबियांच्या मदतीला धावला आहे.
याबाबत अधिक माहिती अशी की, शाहरुख खान हा बॉलिवूडमधील सर्वात लोकप्रिय अभिनेता म्हणून ओळखला जातो. आपल्या दमदार अभिनयाने आणि आव्हानात्मक भूमिकांनी त्याने सिने जगतात स्वतःची ओळख निर्माण केली आहे. शाहरुख त्याच्या अभिनयाइतकाच त्याच्या दिलदारपणासाठीही ओळखला जातो. शाहरुख स्वतःच्या एनजीओमार्फत गरजूंची मदत करत असतो. आता शाहरुख दिल्लीमध्ये अपघातात मृत्यू पावलेल्या अंजली सिंगच्या कुटूंबियांच्या मदतीला धावला आहे.
शाहरुख खानच्या मीर फाऊंडेशनकडून अंजली सिंगच्या कुटूंबियांना मदत केली जाणार आहे. अंजली सिंग तिच्या घरातील कमावती सदस्य असल्याने शाहरुख खानच्या मीर फाऊंडेशनकडून तिच्या आईच्या आरोग्याचाही खर्च केला जाणार आहे. याबद्दलची माहिती सोशल मीडियावरुन समोर आली आहे.
शाहरुखने (Shahrukh Khan) अंजलीच्या कुटूंबियांना केलेल्या आर्थिक मदतीचा आकडा अद्याप समोर आला नसला तरी शाहरुख खानच्या या मदतीचे सोशल मीडियावरुन कौतुक होताना दिसत आहे. दरम्यान, शाहरुख खानची मीर फाऊंडेशन ही त्याचे वडील मीर ताज मोहम्मद खान यांच्या नावाने सुरू करण्यात आली आहे. ज्यामाध्यमातून गरजूंना मदत केली जाते.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.