सलमान खानच्या घरावरील गोळीबार प्रकरणी मोठी अपडेट; बिश्नोई गँगच्या तिघांना अटक, चंदीगढ कनेक्शनही उघड

>> सचिन गाड, साम टीव्ही प्रतिनिधी, मुंबई

बॉलिवूड अभिनेता सलमान खानच्या घरावर गोळीबार प्रकरणी एक महत्वाची अपडेट समोर आली आहे. आतापर्यंत या प्रकरणात मुंबई पोलिसांच्या गुन्हे शाखेने आतापर्यंत सहा जणांना अटक केली आहे. आज चंदीगढ पोलिसांच्या गुन्हे शाखेने बिश्नोई गँगच्या तीन सदस्यांना अटक केली आहे.

आतापर्यंत मुंबई पोलिसांच्या गुन्हे शाखेने सलमानच्या घरावर गोळीबार करणाऱ्या सहा आरोपींना अटक केलेली आहे. विक्की चौधरी, सागर पाल, सोनू चंदर, अनुज थापन आणि मोहम्मद चौधरी असं पोलिसांनी अटक केलेल्या आरोपींचे नाव आहेत. पण यातील सहाव्या आरोपीची ओळख पटू शकलेली नाही. अशातच आता चंदीगढ पोलिसांच्या गुन्हे शाखेने बिश्नोई गँगच्या तीन सदस्यांना अटक केली आहे. गोळीबार प्रकरणामध्ये शुटर्सना मदत करण्याच्या संशयावरून त्यांना अटक केलेली आहे.

रवींद्र सिंह, करण कपूर आणि जावेद झिंझा असे आरोपींची नावं आहेत. या तिनही आरोपींवर पंजाब, राजस्थान आणि चंदीगडमध्ये सहा गुन्हे दाखल आहेत. हे सर्व आरोपी वर्च्युअल नंबर आणि मोबाईल ॲप्लिकेशनच्या मदतीने एकमेकांच्या संपर्कात होते. बिश्नोई गँगच्या या तीनही सदस्यांना चंदीगढ पोलिसांनी अटक केलेली असून लवकरच त्यांना मुंबई पोलिसांच्या ताब्यात देणार आहे. अभिनेता सलमान खानच्या घरावर १४ एप्रिलला पहाटे विक्की चौधरी आणि सागर पाल या दोन आरोपींनी गोळीबार केला होता.