धार्मिक भावना दुखावल्याने अभिनेता गोत्यात; रणवीर सिंहच्या विरोधात पोलिसांत गुन्हा

बॉलिवूड अभिनेता रणवीर सिंह गोत्यात अडकला आहे. दाक्षिणात्य अभिनेता ऋषभ शेट्टीच्या 'कांतारा चॅप्टर १' सिनेमावर एका फिल्म फेस्टिवलमध्ये टिप्पणी करणे महागात पडलं आहे. ऋषभने सिनेमात चामुंडेश्वरी देवीची भूमिका निभावली होती. याच देवीच्या भूमिकेवर टिप्पणी केल्याने सोशल मीडियावर माफी मागितली होती. मात्र माफी मागितल्यानंतर रणवीरच्या विरोधात धार्मिक भावना दुखावल्याप्रकरणी गुन्हा नोंदवण्यात आला आहे.

अधिवक्ता प्रशांत मेथलने रणवीर सिंहच्या विरोधात पोलिसांत तक्रार दिली. त्यानंतर बेंगळुरूच्या ग्राऊंड्स पोलीस स्टेशनमध्ये भारतीय न्याय संहिता २०२३ च्या कलम २९९, ३०२ आणि १९२ अंतर्गत अभिनेता रणवीरवर गुन्हा दाखल करण्यात आला आहे.

अधिवक्ता प्रशांत यांनी म्हटलं की, 'मी भारताचा कायदे पाळणारा नागरिक आणि अधिवक्ता आहे. अभिनेता रणवीर सिंह याने केलेल्या वादग्रस्त कृत्याची तात्काळ दखल घेण्यात यावी, यासाठी मी तक्रार नोंदवत आहे. त्यांच्या कृत्यामुळे कोट्यवधी हिंदूं आणि कर्नाटकातील तुलू भाषिक समुदायाच्या धार्मिक भावना दुखावल्या गेल्या आहेत'.

तक्रारीत पुढे म्हटलं आहे की, 'मागील काही दिवसांपासून सोशल मीडियावर एक व्हिडिओ व्हायरल होत आहे. हा व्हिडिओ गोव्यात आयोजित आंतरराष्ट्रीय फिल्म फेस्टिवलमधील आहे. या फेस्टिवलमध्ये रणवीर सिंहने 'कांतारा' सिनेमात दाखवल्या देवीची खिल्ली उडवली. त्याने कर्नाटकातील तुलू भाषिकांच्या मनात आदराचं स्थान असलेल्या देवीवर खिल्ली उडवणारी टिप्पणी केली. चांमुडेश्वरी असे या देवीचं नाव आहे. सार्वजनिक ठिकाणी ईश्वराची निंदा केली आणि हिंदूंच्या भावना दुखावल्या, असा आरोप तक्रारकर्त्याने केला.

'खिल्ली उडवणाऱ्या अभिनेत्याचे लाखो चाहते आहेत. या अभिनेत्याने आंतरराष्ट्रीय मंचावरून देवतेची खिल्ली उडवली आहे. त्याने जाणूनबुजून खिल्ली उडवली. आता त्याचा व्हिडिओ सोशल मीडियावर व्हायरल होत आहे. या व्हिडिओनंतर त्याच्याविरोधात संताप व्यक्त केला जात आहे, असेही अधिवक्ता प्रशांत यांनी म्हटलंय.