शीतल तेजवानीच्या मुसक्या आवळल्या, गोरगरिबांच्या जमिनी हडपणाऱ्या मास्टरमाईंडचे काळे कारनामे समोर

पुण्यातील मुंढवा जमीन व्यवहार प्रकरणातील प्रमुख आरोपी शीतल तेजवानीला अटक करण्यात आली आहे. तेजवानी ही मुंढवा जमीन प्रकरणात मुख्य सूत्रधार होती. पुणे पोलिसांनी याच तेजवानीला जमीन बेकायदेशीर विक्री आणि हडपल्या प्रकरणात बेड्या ठोकल्या आहेत. आता तेजवानीचे काळे कारनामे समोर येऊ लागले आहेत.

मुंढवा जमीन व्यवहार प्रकरणातील आरोपी शीतल तेजवानीच्या अटक करण्याची कारणे देखील समोर आली आहेत. शासनाचे कोणतेही आदेश नसतानाही जमिनीचे मूळ वतनदार आणि वारसदारांकडून कागदपत्र तयार करून जमीन विक्री प्रकरणात फसवणूक केल्यामुळे अटक केल्याचे समोर आलं आहे. शीतलने शासनाची जमीन परस्पर विक्री करत थेट शासनाची फसवणूक केली .

तेजवानीने स्वतःच्या फायद्यासाठी जमीन विक्री केल्याचं पोलीस तपासात निष्पन्न झालं आहे. तेजवानीने मुंढवा येथील जमिनीचा ७/१२ बंद असतानाही व्यवहाराच्या वेळी जोडला. याच प्रकरणी शीतल तेजवानीच्या विरोधात खडक पोलीस ठाण्यात गुन्हा नोंदवण्यात आलाय. या गुन्ह्याचा तपास पुणे पोलिसांच्या आर्थिक गुन्हे शाखेकडून सुरू आहे. या प्रकरणाबाबत चौकशी करून पोलिसांनी तेजवानीकडे खुलासा मागितला होता.

कोण आहे शीतल तेजवानी?

शीतल तेजवानी ही पिंपरीची रहिवासी आहे. तिच्या नवरा सागर सूर्यवंशी याच्याविरोधातही फसवणुकीचे गुन्हे दाखल आहेत. तिच्या विरोधात पिंपरी-चिंचवड पोलीस ठाण्याच्या हद्दीमध्ये सेवा विकास सहकारी बँकेची आर्थिक फसवणूक केल्याप्रकरणी गुन्हे दाखल आहेत.

अटक केलेल्या तेजवानीच्या विरोधात सीआयडी आणि ईडीनेही कारवाई केली होती. तिला सहकारी बँकेच्या फसवणूक प्रकरणात अटक देखील झाली होती. शेतकऱ्यांची फसवणूक केल्याप्रकरणीही तिच्या विरोधात दोन गुन्हे दाखल झाले होते.