Actress Father Story: भारतीय सैन्यातील वडिलांना दहशतवाद्यांनी मारलं तेव्हापासून...; बॉलीवूडच्या अभिनेत्रीने सांगितली हृदयद्रावक कहाणी

Actress Father Killed By Terrorists: बॉलिवूड अभिनेत्री निमरत कौरच्या आयुष्यातील एक अत्यंत वेदनादायक घटना म्हणजे तिच्या वडिलांचा शहीद होणं. निमरतच्या वडिलांचं नाव मेजर भूपेंद्र सिंह आहे, जे भारतीय लष्करात अभियंता अधिकारी होते. 1994 मध्ये काश्मीरमधील वेरीनाग येथे तैनात असताना, हिजबुल मुजाहिदीन या दहशतवादी संघटनेने त्यांचं अपहरण केलं आणि सात दिवसांनी त्यांची हत्या केली. त्यावेळी मेजर सिंह वयाच्या 44 व्या वर्षी होते, तर निमरत फक्त 12 वर्षांची होती.

निमरत कौरने एका मुलाखतीत सांगितलं की, "ते एक तरुण आर्मी मेजर होते, वेरीनाग येथील आर्मीच्या सीमावर्ती रस्त्यांवर ते तैनात होते. काश्मीर हे कुटुंबासाठी योग्य ठिकाण नव्हतं, म्हणून जेव्हा त्यांची पोस्टिंग काश्मीरला झालेली, त्यावेळी आम्ही पटियालातच राहायचो. जानेवारी 1994 मध्ये, आम्ही आमच्या हिवाळ्याच्या सुट्ट्यांमध्ये माझ्या वडिलांना भेटण्यासाठी काश्मीरला गेलेलो, त्यावेळी हिजबुल मुजाहिदीननं त्यांचं त्यांच्या वर्कस्टेशनवरून अपहरण केलं आणि सात दिवसांनी त्यांना नोकरीवरून काढून टाकलं."

दहशतवाद्यांनी मेजर सिंह यांना सोडण्यासाठी सरकारकडे काही मागण्या केल्या होत्या, ज्यामध्ये काही दहशतवाद्यांची सुटका करण्याची अट होती. मात्र, मेजर सिंह यांनी आपल्या कर्तव्याला प्राधान्य देत या मागण्या मान्य करण्यास नकार दिला. त्यामुळेच दहशतवाद्यांनी त्यांची निर्घृण हत्या केली. या घटनेनंतर, निमरत आणि तिच्या कुटुंबाने काश्मीरला पुन्हा कधीच न जाण्याचा निर्णय घेतला.

मेजर भूपेंद्र सिंह यांच्या शौर्याबद्दल भारत सरकारने त्यांना मरणोत्तर शौर्य चक्राने सन्मानित केलं. निमरत कौरने आपल्या वडिलांच्या आठवणी जपण्यासाठी राजस्थानमधील श्रीगंगानगर येथे एक स्मारक उभारलं, ज्यामध्ये तिच्या आई आणि बहिणीनेही सहभाग घेतला. या स्मारकात मेजर सिंह यांच्यासह इतर शहीद जवानांचाही सन्मान करण्यात आला आहे.

निमरत कौरने 'द लंचबॉक्स', 'एयरलिफ्ट' आणि 'दसवी' यांसारख्या चित्रपटांमध्ये आपल्या अभिनयाने प्रेक्षकांची मनं जिंकली आहेत. तिच्या वडिलांच्या बलिदानाने तिच्या आयुष्यातील दृष्टिकोन बदलला आणि ती नेहमीच आपल्या वडिलांच्या शौर्याचा अभिमान बाळगते. निमरत कौरच्या या अनुभवाने अनेकांना प्रेरणा मिळते आणि देशासाठी बलिदान देणाऱ्या सैनिकांच्या कुटुंबांच्या संघर्षाची जाणीव होते.