Vaishali Shinde Passed Away: बुलंद आवाज हरपला! ज्येष्ठ गायिका वैशाली शिंदे यांचं निधन

Vaishali Shinde News:

आंबेडकरी चळवळीतील (Ambedkari Chalval) ज्येष्ठ गायिका वैशाली शिंदे (veteran singer vaishali) यांचं निधन झालं आहे. त्यांच्या निधनामुळे आंबेडकर चळवळीचा बुलंद आवाज हरपल्याचे बोलले जात आहे. वैशाली शिंदे यांचे ६२व्या वर्षी निधन झाले. गेल्या अनेक महिन्यांपासून त्या आजारी होत्या. उपचारादरम्यान त्यांचे निधन झाले.

मिळालेल्या माहितीनुसार, वैशाली शिंदे या गेल्या अनेक वर्षांपासून मधुमेहाने त्रस्त होत्या. त्यांच्या पायाला देखील गँगरीन झाले होते. उपचारासाठी त्यांना केईएम रुग्णालयामध्ये दाखल करण्यात आले होते. अशामध्येत गुरूवारी संध्याकाळी त्यांचे उपचारादरम्यान निधन झाले. त्यांच्या पार्थिवावर आज घाटकोपरच्या भटवाडी येथील स्मशानभूमीत अंत्यसंस्कार करण्यात आले. वैशाली शिंदे यांच्या पश्चात एक मुलगा आहे. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

आपल्या दमदार गाण्यांच्या माध्यमातून वैशाली शिंदे यांनी आंबेडकरी चळवळीला बळ दिले होते. वैशाली शिंदे यांना त्यांच्या आई-वडिलांकडून गाण्याचा वारसा मिळाला होता. त्यांचे वडील रामचंद्र आणि आई सरुबाई क्षीरसागर हे दोघंही भीमगीत गायचे. त्यांच्यापासूनच वैशाली गाणं शिकल्या होत्या. आई-वडिलांनी दिलेला वारसा सांभाळत वैशाली भीमगीत आणि बुद्धांची गाणी गात होत्या.

सोलापूरवरून आई-वडिलांसोबत वैशाली शिंदे या पुण्यात आल्या. त्यानंतर त्यांनी विष्णू शिंदे यांच्यासोबत लग्न केले. वैशाली शिंदे यांचे लग्नापूर्वीचे नाव दया क्षीरसागर होते. पण लग्नानंतर त्यांचे नाव वैशाली झाले. विष्णू शिंदेंसोबत लग्न केल्यानंतर त्या पुण्यावरून मुंबईत आल्या. तेव्हापासून त्या मुंबईमध्येच राहत होत्या. वैशाली शिंदे यांच्या निधनामुळे त्यांचे चाहते आणि कुटुंबीयांना धक्का बसला आहे. सोशल मीडियाच्या माध्यमातून सर्वस्तरावरून त्यांना श्रद्धांजली वाहिली जात आहे.