मराठा समाजाला आरक्षण (Maratha Reservation) मिळावं हा मुद्दा उचलून धरून गेल्या काही महिन्यांपासून आंदोलन करणारे मराठा समजाचे नेते मनोज जरांगे पाटील चर्चेत आहे. मराठा समाजाला आरक्षण मिळावे यासाठी संघर्ष करणारे मनोज जरांगे पाटील (Manoj Jarange) यांचा जीवनप्रवास लवकरच रुपेरी पडद्यावर दिसणार आहे. मनोज जरांगे पाटील यांच्या जीवनावर आधारित 'संघर्षयोद्धा' हा चित्रपट (Sangharsh Yodha Movie) प्रेक्षकांच्या भेटीला येणार आहे. या चित्रपटाची प्रेक्षक आतुरतेने वाट पाहत आहे. या चित्रपटाबाबत महत्वाची माहिती समोर आली आहे. या चित्रपटाचे शूटिंग पूर्ण झाले आहे.
मनोज जरांगे पाटील यांच्या जीवनावर आधारित 'संघर्षयोद्धा' या चित्रपटाची शूटिंग जालना जिल्ह्यातील अंतरवाली सराटी येथे सुरू होते. जानेवारीपासून या चित्रपटाच्या शूटिंगला सुरूवात झाली होती. आता या चित्रपटाचे शूटिंग पूर्ण झाले आहे. हा चित्रपट येत्या २६ एप्रिल २०२४ ला संपूर्ण महाराष्ट्रभर प्रदर्शित होणार आहे.
अभिनेता रोहन पाटील 'संघर्षयोद्धा' या चित्रपटामध्ये मनोज जरांगे पाटील यांची भूमिका साकारत आहे. गोवर्धन दोलताडे यांनी चित्रपटाची कथा आणि निर्मिती केली आहे. सुधीर निकम यांनी पटकथा आणि संवाद लेखन केले आहे. तर शिवाजी दोलताडे यांनी या चित्रपटाच्या दिग्दर्शनाची जबाबदारी सांभाळली आहे. 'संघर्षयोद्धा' या चित्रपटात अभिनेत्री सुरभी हांडे, अभिनेते मोहन जोशी, श्रीनिवास पोकळे, संजय कुलकर्णी, माधवी जुवेकर, विजय मिश्रा, विनीत भोंडे, सुनील गोडबोले, जयवंत वाडकर हे कलाकार प्रमुख भूमिकेमध्ये आहेत.
दरम्यान, मनोज जरांगे पाटील यांच्या उपोषणानंतर राज्यसरकारने आज राज्य विधीमंडळाचे विशेष अधिवेशन बोलावले होते. या अधिवेशनामध्ये मराठा आरक्षण विधेयक एकमताने मंजूर केले. असे असताना देखील मनोजर जरांगे पाटील हे उपोषणावर ठाम आहेत. उपोषणाला बसलेल्या जरांगे पाटील यांनी स्वत:च हाताला लावलेली सलाइन काढली. आंदोलनाची पुढची दिशा ते उद्या ठरणार असल्याचे त्यांनी आज जाहीर केले.
सकाळ+चे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.