Umesh-Priya : लपवा-लपवीचे दिवस अन् पेपरात फोटो; उमेशने सांगितला रिलेशनशिपचा हटके किस्सा!

मराठी सिनेसृष्टीतील क्यूट कपल प्रसिद्ध अभिनेता उमेश कामत (Umesh Kamat ) आणि अभिनेत्री प्रिया बापट ( Priya Bapat) हे नेहमीच कोणत्या ना कोणत्या कारणामुळे चर्चेत असतात. नुकतेच त्यांनी 'झी मराठी पुरस्कार' सोहळ्याला आपली हजेरी लावली होती. यावेळी उमेशने एक भन्नाट किस्सा सांगितला. हा किस्सा उमेश आणि प्रिया एकमेकांना डेट करत होते त्यावेळचा आहे.

उमेश किस्सा सांगताना म्हणाला की, "मी आणि प्रिया एकदा वांद्रे रेक्लेमेशनला बसलो होतो. आम्ही बाईक लावून कट्ट्यावर बसलो होतो. तेव्हा आमच्या रिलेशनशिपमध्ये लपवा-लपवीचे दिवस चालू होते. मला दुसऱ्या दिवशी प्रियाचा फोन आला की, अरे उमेश एका वृत्तपत्रात आपला फोटो आला आहे. रेक्लेमेशनच्या कट्ट्याचा फोटो आहे तो." पुढे उमेश बोलतो की, "बरं त्यावेळी वृत्तपत्रात झूम वगैरे करून पाहायची सोय नव्हती त्यामुळे चांगल झालं. त्यावेळी आम्ही दोन दिवस एकमेकांची समजूत काढली होती. आम्हाला वाटलं की आता आपलं भांड फुटणार आणि घरच्यांना कळणार"

उमेश अनेक मुलाखतीत आपल्या लव्हस्टोरीचे किस्से सांगत असतो.मात्र हा नवाकोरा २५ वर्षांपूर्वीचा किस्सा त्यांनी 'झी मराठी पुरस्कार' मंचावर सांगितला. उमेशला फोन करताना प्रिया प्रचंड घाबरलेली होती. मात्र प्रियाने सांगितले की, "त्यांनी आमचा मुद्दाम हा फोटो काढला नव्हता, हे पावसाळ्याचे दिवस होते." उमेश कामत आणि प्रिया बापट यांनी 2011 लग्नगाठ बांधली. लग्नाआधी ते काही काळ एकमेकांना डेट करत होते.

पुढे प्रियाने सांगितले की, "माझ्या मैत्रिणीच्या मावशीने मला ओळखले होते. तिने माझ्या मैत्रिणीला विचारले की, ही प्रिया आहे ना? हे मला मैत्रिणीने फोनवर सांगितले. तेव्ही मी घरी पेपरमधले ते फोटोचे पानच कापून टाकलं होतं" उमेश आणि प्रियाचा हा मजेशीर किस्सा ऐकून सर्वजण हसू लागतात.