Krantijyoti Vidyalay Marathi Madhyam : 'क्रांतिज्योती विद्यालय मराठी...' ला मिळाले घवघवीत यश; निर्मात्यांनी सीक्वलची घोषणा करत दिलं मोठं सरप्राइज

हेमंत ढोमे दिग्दर्शित 'क्रांतिज्योती विद्यालय मराठी माध्यम' चित्रपट आणि सिनेमातील गाणी सोशल मीडियावर तुफान गाजत आहे. हा चित्रपट 1 जानेवारी 2026ला रिलीज झाला. चित्रपटात मराठी शाळा आणि मराठी भाषेबद्दलचे मत, विचार मांडले आहेत. ज्यामुळे चित्रपटाने महाराष्ट्रातील प्रेक्षकांचे भरपूर प्रेम मिळवले आहे. थिएटर हाऊसफुल पाहायला मिळत आहेत.

'क्रांतिज्योती विद्यालय मराठी माध्यम' या चित्रपटाला प्रेक्षकांकडून भरपूर प्रेम मिळाले. चित्रपटाने देखील बॉक्स ऑफिसवर बंपर कमाई केली आहे. आता 'क्रांतिज्योती विद्यालय मराठी माध्यम' चित्रपटाच्या घवघवीत यशानंतर चित्रपटाचे दिग्दर्शक आणि निर्माते हेमंत ढोमे आणि क्षिती जोग यांनी चाहत्यांना आनंदाची बातमी दिली आहे.

नुकतीच 'क्रांतिज्योती विद्यालय मराठी माध्यम' चित्रपटाच्या यशाची जल्लोष साजरा करण्यात आला. या पार्टीला अनेक कलाकारांनी उपस्थिती लावली. ज्याचे व्हिडीओ आणि फोटो सोशल मीडियावर तुफान व्हायरल होत आहेत. या सोहळ्यात हेमंत ढोमे आणि क्षिती जोग यांनी 'क्रांतिज्योती विद्यालय मराठी माध्यम' चित्रपटाचा दुसरा भाग येणार असल्याची घोषणा केली. ज्यामुळे प्रेक्षकांना प्रचंड आनंद झाला आहे. तसेच हेमंत आणि क्षितीने चाहत्यांना डबल सरप्राइज दिले आहे.

हेमंत ढोमे आणि क्षिती जोग यांनी सुपरहिट 'झिम्मा' फ्रँचायझीचा पुढचा भाग म्हणजे 'झिम्मा 3 'ची देखील घोषणा केली आहे. 'झिम्मा' आणि 'झिम्मा 2 ' ला प्रेक्षकांनी भरपूर प्रेम दिले आहे. आता हे दोन्ही चित्रपट पाहण्यासाठी प्रेक्षक उत्सुक आहेत. मात्र अद्याप कोणत्याही चित्रपटाची रिलीज डेट समोर आली नाही.

चित्रपटातील कलाकार

'क्रांतिज्योती विद्यालय मराठी माध्यम' चित्रपटात तगडे कलाकार पाहायला मिळत आहेत. यात सचिन खेडेकर, अमेय वाघ, सिद्धार्थ चांदेकर, पुष्कराज चिरपुटकर, हरीश दुधाडे, कादंबरी कदम, क्षिती जोग, निर्मिती सावंत आणि प्राजक्ता कोळी हे झळकले आहेत.