Oscar 2026: भारताचं ऑस्कर जिंकण्याचं स्वप्न पूर्ण होणार का? करण जोहरचा 'होमबाउंड'ची टॉप १५ मध्ये एन्ट्री

Oscar 2026: ९८ व्या अकादमी पुरस्कारांसाठी भारताकडून ईशान खट्टर आणि विशाल जेठवा अभिनीत 'होमबाउंड' हा चित्रपट अधिकृतपणे सादर करण्यात आला होता. जगभरातील ८६ चित्रपटांना सर्वोत्कृष्ट आंतरराष्ट्रीय फीचर फिल्म श्रेणीमध्ये स्थान देण्यात आले होते. त्यापैकी फक्त १५ चित्रपटांनाच निवडण्यात आले होते. भारताचा 'होमबाउंड' हा चित्रपट या १५ चित्रपटांपैकी एक आहे. हे १५ चित्रपट आता वोटींगसाठी पुढील फेरीत गेले आहेत. मतदानाच्या पुढील फेरीनंतर, या १५ चित्रपटांपैकी १० चित्रपट पुढील टप्प्यात जाण्यासाठी निवडले जातील.

या १० चित्रपटांची घोषणा २२ जानेवारी रोजी केली जाईल. शेवटी या १० चित्रपटांपैकी एक चित्रपट ऑस्कर जिंकेल. भारताचा 'होमबाउंड' आता ऑस्कर जिंकण्यापासून फक्त दोन पावले दूर आहे. निर्माता करण जोहरने चित्रपटाला टॉप १५ मध्ये स्थानाबद्दल आनंद व्यक्त केला आणि म्हटले की हे त्याच्यासाठी स्वप्न पूर्ण होण्यासारखी ही गोष्ट आहे.

करण जोहरने आनंद व्यक्त केला

करण जोहरने अकादमी पुरस्कार पोस्टचा स्क्रीनशॉट शेअर केला आणि कॅप्शन लिहिले की, "होमबाउंडच्या प्रवासाबद्दल मी किती अभिमानी, आनंदी आणि उत्साहित आहे हे मी शब्दात व्यक्त करू शकत नाही. धर्मा मूव्हीजमधील सर्वजण हा महत्त्वाचा चित्रपट मिळाल्याबद्दल भाग्यवान आहेत, असा चित्रपट ज्याचा भारताला अभिमान वाटेल."

करण जोहरने चित्रपटाचे दिग्दर्शक नीरज घायवान यांचे आभार व्यक्त करत लिहिले, "धन्यवाद, नीरज घायवान, आमची इतकी स्वप्ने सत्यात उतरवल्याबद्दल. कान्सपासून ते ऑस्कर शॉर्टलिस्टपर्यंत, हा प्रवास अविश्वसनीय आहे. या खास चित्रपटाच्या संपूर्ण कलाकारांना, क्रू आणि टीमला खूप खूप प्रेम. होमबाउंड आता नेटफ्लिक्सवर स्ट्रीम होत आहे."