Mumbai Firing case : KRK ला पोलिसांनी घेतलं ताब्यात; अभिनेत्याने दिली गुन्ह्याची कबुली, नेमकं प्रकरण काय?

मनोरंजन सृष्टीतून धक्कादायक बातमी समोर आली आहे. सोशल मीडिया सेलिब्रिटीला गोळीबार प्रकरणी अटक करण्यात आली आहे. 18 जानेवारीला मुंबईत ओशिवरा अंधेरी येथील एका बिल्डींगमध्ये गोळीबार केल्याच्या आरोपाखाली सोशल मीडिया सेलिब्रिटी कमाल राशिद खान (Kamaal R. Khan- केआरके) ला पोलिसांनी ताब्यात घेतले आहे. नेमकं प्रकरण काय, जाणून घेऊयात.

मीडिया रिपोर्टनुसार, लेखक-दिग्दर्शक नीरज कुमार मिश्रा हे गोळाबार झालेल्या बिल्डींगमध्ये दुसऱ्या मजल्यावर आणि मॉडेल प्रतीक बैद चौथ्या मजल्यावर राहतात. सुरुवातीला गोळ्या कोणी झाडल्या हे स्पष्ट नव्हते. मात्र आता तपासा दरम्यान असे समजले की, केआरकेने गोळीबार केला आहे.अभिनेत्याला त्याच्या स्टुडिओमधून ताब्यात घेण्यात आले आहे.ओशिवरा गोळीबार प्रकरणी मुंबई पोलिसांनी अभिनेता आणि दिग्दर्शक कमल आर खानला ताब्यात घेतले आहे. सुदैवाने या घटनेत कोणीही जखमी झाले नाही. ही घटना नालंदा सोसायटीत घडली. गोळीबारानंतर दुसऱ्या आणि चौथ्या मजल्यावरील फ्लॅटमध्ये गोळ्यांचे निशाण आढळून आले.

मुंबई पोलिसांनी चौकशी केल्यावर समजले की, केआरकेने स्वतःच्या लाइसेंस बंदुकीने गोळ्या झाडल्या (4 Rounds) आहेत. तशी त्याने कबुली देखील दिली आहे. केआरकेच्या म्हणण्यानुसार, केआरकेचा कोणालाही इजा करण्याचा हेतू नव्हता. तो त्याची बंदूक साफ करत होता. त्याच्या घरासमोर एक मोठे खारफुटीचे जंगल आहे. जिथे बंदूक साफ केल्यानंतर त्याची टेस्ट करण्यासाठी त्याने गोळीबार केला. अभिनेत्याला वाटले होते की, गोळी खारफुटीच्या जंगलात जाईल, पण जेव्हा त्याने गोळीबार केला तेव्हा सोसाट्याचा वारा आला त्यामुळे गोळी थोडी पुढे जाऊन ओशिवरा परिसरातील एका इमारतीला लागली. पोलिसांनी केआरकेची बंदुक जप्त केली आहे, जी त्याने गोळीबार करण्यासाठी वापरली होती. या प्रकरणाची चौकशी अजूनही सुरू आहे.

कमाल आर खान कोण?

केआरके सोशल मीडियावर खूप सक्रिय असतो. तो एक प्रसिद्ध चित्रपट समीक्षक आहे. तो अनेकदा सोशल मीडियाच्या माध्यमातून चित्रपटांवर टीका करताना दिसतो. तसेच बॉलिवूड स्टार्सना शिवीगाळ करताना दिसतो. कमल आर खान 'देशद्रोही' चित्रपटात दिसला. त्याने चित्रपटसृष्टीत निर्माता म्हणूनही काम केले आहे. केआरके 'बिग बॉस 3' मध्ये दिसला, ज्यामुळे त्याला आणखी प्रसिद्धी मिळाली. त्याने 'एक व्हिलन' चित्रपटात सहाय्यक भूमिका साकारली.