Jabrat Movie: मैत्री जागणाऱ्या अतरंगी मित्रांची कथा; 'जब्राट' हा नवीन मराठी चित्रपट लवकरच प्रेक्षकांच्या भेटीला

Jabrat Marathi Movie: आयुष्याच्या वाटेवर आपल्याला अनेक नवनवीन मित्रमैत्रिणी भेटतात. यात काही जण कायम आपल्यासोबत राहतात. मैत्री अखेरपर्यंत निभावणं प्रत्येकाला जमत नाही. आपल्या मैत्रीला जागणाऱ्या मित्रांची कथा सांगणारा तारा करमणूक निर्मित प्रगती कोळगे दिग्दर्शित 'जब्राट' हा नवीन मराठी चित्रपट नववर्षारंभी रुपेरी पडद्यावर येणार आहे. नुकतेच या चित्रपटाचे दमदार असं पोस्टर प्रदर्शित करण्यात आलं आहे.

‘लव्ह, म्युझिक, मस्ती आणि डान्स’ या फॉर्म्युल्यावर आधारित असलेला 'जब्राट' हा चित्रपट नववर्षारंभी प्रेक्षकांच्या भेटीला येणार आहे. या चित्रपटात नव्या पिढीतील आयुष संजीव, अनुष्का सरकटे, वनिता खरात, श्रेया शंकर यांच्यासोबत ज्येष्ठ कलाकार संजय मोने, सुरेखा कुडची, जयवंत वाडकर आणि गणेश यादव यांचाही सहभाग आहे.

या चित्रपटाच्या निर्मितीची धुरा अनिल अरोरा, गोविंद मोदी आणि प्रगती कोळगे यांनी सांभाळली आहे. छायाचित्रण अनिकेत खंडागळे यांचं असून, नृत्यदिग्दर्शन ‘लावणी किंग’ म्हणून ओळखले जाणारे आशिष पाटील यांनी केले आहे.

संगीत हा या चित्रपटाचा सर्वात मोठा आकर्षण ठरणार असून, डॉ. जयभीम शिंदे यांच्या संगीत दिग्दर्शनाखाली बेला शेंडे, आर्या आंबेकर, वैशाली माडे, नंदेश उमाप आणि इतर नामवंत गायकांनी गाणी सादर केली आहेत. प्रेमगीते, प्रेरणादायी गाणी आणि लोकगीतांचा संगम असलेला हा चित्रपट प्रेक्षकांना संगीताच्या वेगळ्या दुनियेत घेऊन जाणार आहे. नववर्षाच्या स्वागतासाठी ‘जब्राट’ हा चित्रपट मैत्री, प्रेम आणि मनोरंजनाचा खऱ्या अर्थाने जबरदस्त मेजवानी ठरणार आहे