'हम २ हमारे १२' चित्रपटाला मुस्लिम संघटनांचा विरोध

गेल्या काही दिवसांपूर्वी 'हम २ हमारे १२' चित्रपटाचा (Ham 2 Hamare 12 Movie) पोस्टर रिलीज झालेला होता. चित्रपटाची घोषणा झाल्यापासूनच खरंतर हा चित्रपट वादाच्या भोवऱ्यात अडकलेला आहे. अशातच नुकताच या चित्रपटाचा टीझर रिलीज झाला होता. टीझर रिलीज होताच चित्रपटाला पुन्हा एकदा एका धार्मिक संघटनाकडून विरोध करण्यात आला आहे. चित्रपटाला विरोध करण्यासाठी नाशिकच्या रझा अकादमीने बैठक घेतली होती. यावेळी बैठकीत चित्रपटाच्या विरोधात आंदोलन करण्याचा इशारा देण्यात आला आहे.

समाजाच्या धार्मिक भावना दुखवणारे काही सीन्स या टीझरमध्ये दाखवण्यात आले आहेत. यामुळे समाजामध्ये धार्मिक तेढ निर्माण होण्याची शक्यता असल्यामुळे या चित्रपटाला विरोध केला जात आहे. देशभरात हा चित्रपट कुठेही रिलीज होऊ नये, अशी मागणी केली जात आहे. त्यासोबतच सोशल मीडियावरून टीझर आणि ट्रेलरही त्वरित डिलीट करण्यात यावा, अशी मागणी रझा अकादमीचे सदस्य सईद नुरी आणि माजी नगरसेवक मुशीर सय्यद यांनी केली आहे. टीझर आणि ट्रेलर जर डिलीट झाला नाही तर, कायदेशीर आंदोलनाची भूमिका घेणार असल्याचेही त्यांनी सांगितले.