Firing On Singer: जिमबाहेर घात लावून बसले, बाहेर येताच गायकावर झाडल्या धाडधाड २० गोळ्या

पश्चिम उत्तर प्रदेशातील शामली येथे हरियाणवी गायक अंकित बालियान याची गोळ्या झाडून हत्या झालीय. सदर कोतवाली भागात ही हत्येची घटना घडलीय. मिळालेल्या माहितीनुसार, अंकित नेहमीप्रमाणे जिममध्ये गेला होता. सायंकाळी पावणेसातच्या सुमारास तो बाहेर पडल, त्यावेळी दबा धरून बसलेल्या हल्लेखोरांनी त्याच्यावर अंदाधुंद गोळीबार केला.

प्रत्यक्षदर्शींच्या म्हणण्यानुसार, हल्लेखोरांनी २० हून अधिक गोळ्या झाडल्या. अचानक झालेल्या या गोळीबारामुळे परिसरात घबराट पसरली. दरम्यान गोळ्या लागल्याने अंकित गंभीर जखमी झाला. तेथील उपस्थित लोकांनी त्याला तातडीने रुग्णालयात नेले, परंतु उपचारादरम्यान त्याचा मृत्यू झाला.

मिळालेल्या माहितीनुसार, अंकित बालियानवर हल्लेखोरांनी गोळीबार केल्यानंतर त्यांनी घटनास्थळावरून पळ काढला. ही घटना सदर कोतवाली परिसरातील 'नाला पटरी' (नाल्यालगतचा रस्ता) भागात घडल्याचे सांगण्यात येत आहे. दिवसाढवळ्या घडलेल्या या हत्येची माहिती मिळताच पोलिसांनी घटनास्थळी धाव घेतली आणि तपास सुरू केला.

या गाण्यामुळं प्रसिद्धीच्या झोतात

अंकित बालियान हा मूळचा शामली येथील बंतीखेडा गावचा रहिवासी होता. त्यानंतर तो हरियाणातील रोहतक आणि सोनीपतला राहायचा. तिथेच गायक आणि कलाकार म्हणून जडणघडण झाली. त्यानं हरयाणवी मनोरंजन विश्वात आपली वेगळी ओळख निर्माण केली होती. अनेक लोकप्रिय गाणी त्यानं गायली. तसंच अभिनयही केला. अंकित याचं ‘भरी कोर्ट में गोली मारेंगे मेरी जान’ हे गाणे खूप लोकप्रिय झाले होते. या गाण्यानंतर त्याचे नशीब चमकले होते. अंकितच्या घातपाताच्या वृत्तानं हरियाणवी मनोरंजन सृष्टीवर शोककळा पसरली आहे.

अंकितच्या हत्येनं त्याचं कुटुंब आणि नातेवाइकांवर दुःखाचा डोंगर कोसळला. दिवसाढवळ्या त्याची निर्घृण हत्या करण्यात आली आहे. या घटनेची माहिती मिळताच पोलीस घटनास्थळी पोहोचले. त्यांनी या घटनेचा तपास सुरू केला आहे. अंकित हा मूळचा शामली जिल्ह्यातला बंतीखेडा गावचा रहिवासी होता. संगीत क्षेत्रात त्यानं आपली वेगळी ओळख निर्माण केली होती. गीतकार आणि संगीतकार म्हणूनही त्यानं काम केलं. त्याचा देशी अंदाज आणि गायकीच्या शैलीनं तो चांगलाच लोकप्रिय झाला होता.