ऑनलाईन सट्टेबाजी अ‍ॅप प्रकरणात बॉलिवूडमधील अनेक सेलिब्रिटींची नावे समोर येऊ लागली आहे. त्यामुळे ईडीने आता या कलाकारांना आपल्या रडारवर घेण्यास सुरुवात केली आहे. एकीकडे ईडीने बॉलिवूड अभिनेता रणबीर कपूरला ईडीने समन्स बजावल्याची चर्चा सुरू असताना, आता दुसरीकडे अभिनेत्री श्रद्धा कपूरला देखील समन्स बजावल्याची माहिती आहे. (Latest Marathi News)
श्रद्धा कपूर पाठोपाठ अनेक बॉलिवूड आणि टीव्ही कलाकार ईडीच्या रडारवर आहे. सूत्रांच्या माहितीनुसार, ईडीकडून १५ सेलिब्रिटींना समन्स बजावलं जाण्याची शक्यता आहे. लवकरच या कलाकारांना चौकशीला देखील बोलावलं जाणार आहे. दरम्यान, अभिनेता रणबीर कपूरने चौकशीला हजर राहण्यासाठी दोन आठवड्यांचा वेळ मागितल्याची माहिती आहे.
दुसरीकडे, ईडीने (ED summons) लोकप्रिय विनोदी अभिनेता कपिल शर्मा याला देखील समन्स बजावलं आहे. तर टीव्ही अभिनेत्री हुमा कुरेशी आणि हिना खान यांनाही चौकशीला बोलावलं आहे. या तिन्ही कलाकारांची एकाच दिवशी ईडीकडून चौकशी होणार आहे. मात्र, ही चौकशी कधी होणार याबाबतची माहिती अद्यापही समोर आलेली नाही.
मेसर्स महादेव अ‍ॅप हे पोकर, कार्ड गेम्स, चान्स गेम्स, क्रिकेट, बॅडमिंटन, टेनिस आणि फुटबॉल यांसारख्या विविध लाइव्ह गेम्समध्ये बेकायदेशीर सट्टेबाजीसाठी ऑनलाइन प्लॅटफॉर्म आहे. या अॅपचं कामकाज संयुक्त अरब अमिरातीतील मध्यवर्ती मुख्यालयातून होत असल्याची माहिती ईडीला मिळाली होती.
त्यानुसार ईडीने छापेमारी करत अ‍ॅपशी संबंधित मनी लॉन्ड्रिंग नेटवर्कवर छापे टाकले होते. या कारवाईत ईडीने जवळपास ४१७ कोटी रुपयांची मालमत्ता जप्त केली होती. ईडीने भोपाळ, कोलकाता आणि मुंबई याठिकाणी ही कारवाई केली होती.
दरम्यान, या बेटिंग अ‍ॅप प्रकरणातील मुख्य सूत्रधार सौरभ चंद्राकार याचं दुंबईत लग्न झालं होतं. या लग्नावर जवळपास २०० कोटींचा खर्च करण्यात आला होता. सौरभच्या लग्नाला अनेक बॉलिवूड सेलिब्रिटींनी हजेरी लावली होती. इतकंच नाही, तर सौरभ याच्या लग्नात नृत्य सादरीकरणासाठी कथितपणे पैसे घेतल्याचा आरोप आहे. त्यामुळे अनेक सेलिब्रिटी सध्या ईडीच्या रडारवर आहेत.
सकाळ+चे सदस्य व्हा
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.