DJ Mervin Death: कुत्रा आडवा आला आणि कारचं नियंत्रण सुटलं...; प्रसिद्ध सिनेमॅटोग्राफरचा अपघाती मृत्यू

DJ Mervin Passes Away: सिनेमॅटोग्राफर आणि डीजे म्हणून ओळखला जाणारा डीजे मर्विन यांचा उदुपीजवळ भीषण अपघातात मृत्यू झाला आहे. वयाच्या केवळ ३५व्या वर्षी त्यांनी शेवटचा श्वास घेतला. मर्विन हे कोंकणी आणि तुळु चित्रपटसृष्टीत लोकप्रिय होते तसेच डीजे म्हणूनही त्यांची विशेष ओळख होती.

शनिवारी सकाळी ते आपल्या सहकाऱ्यांसोबत कारने मंगळुरूकडे जात असताना हा अपघात घडला. कौपजवळील मूलूरू येथे रस्त्यावर अचानक कुत्रा आल्याने गाडीचालकाने ब्रेक लावला आणि गाडी पलटी झाली. या दुर्घटनेत मर्विन गंभीर जखमी झाले व त्यांना रुग्णालयात नेले गेले, मात्र उपचाराआधीच त्यांचा मृत्यू झाला. सोबत असलेले इतर सहकारी जखमी असून त्यांच्यावर उपचार सुरू आहेत.

याआधीच म्हणजे २२ ऑगस्टला मर्विन यांनी आपला नवीन म्युझिक व्हिडिओ सोशल मीडियावर शेअर केला होता आणि तो व्हिडिओ आता मोठ्या प्रमाणात व्हायरल होत आहे. त्यांच्या अचानक झालेल्या निधनामुळे संपूर्ण तुळु व कोंकणी चित्रपटसृष्टीवर शोककळा पसरली आहे. त्यांच्या आठवणींना चाहते उजाळा देत आहेत.

त्यांच्या म्युझिक व्हिडिओच्या पोस्टवर चाहते कमेंट करुन श्रद्धांजली देत आहेत एका नेटकऱ्याने लिहीले, खूप धक्कादायक बातमी. आणखी एकाने लिहीले आज त्याचा व्हिडीओ आऊट झाला आणि त्याचे निधन झाले वाटले नव्हते हा त्याचा शेवटचा व्हिडीओ ठरेल.