Box Office Collection: 'कांतारा: चॅप्टर १' ची बॉक्स ऑफिसवर तुफान क्रेझ; ५०० कोटींच्या क्लबमध्ये लवकरच करणार एन्ट्री

Box Office Collection Report: दक्षिणेतील प्रतिभावान अभिनेता-दिग्दर्शक ऋषभ शेट्टी याचा बहुचर्चित चित्रपट ‘कांतारा चॅप्टर 1’ हा २ ऑक्टोबर रोजी प्रदर्शित झाला. तर रोमँटिक-फॅमिली ड्रामा ‘सनी संस्कारी की तुलसी कुमारी’ हा वरुण धवन आणि जान्हवी कपूर यांच्या प्रमुख भूमिका असलेला हा चित्रपट ४ ऑक्टोबर रोजी प्रदर्शित झाला. दोन्ही चित्रपटांना प्रेक्षकांकडून भरभरून प्रतिसाद मिळत असून, पहिल्या दोन आठवड्यांतच त्यांनी बॉक्स ऑफिसवर चांगली कमाई केली.

‘कांतारा चॅप्टर 1’ ने रिलीजच्या १५ व्या दिवशीपर्यंत भारतात तब्बल ४९५ कोटींची कमाई करत विक्रमी यश मिळवले आहे. चित्रपटातील दमदार अभिनय, लोककथांचा अप्रतिम संगम आणि भव्य छायाचित्रण यामुळे प्रेक्षकांना हा चित्रपट फार आवडला आहे. दक्षिणेत या चित्रपटाची मागणी एवढी वाढली आहे की, अनेक ठिकाणी हाऊसफुल्ल शोज लागत आहेत.

तर दुसरीकडे, ‘सनी संस्कारी की तुलसी कुमारी’ या चित्रपटाने आपल्या साध्या पण भावनिक कथानकामुळे उत्तर भारतात प्रेक्षकांची मने जिंकली आहेत. या चित्रपटाने फक्त १५ दिवसांतच ५५ कोटींची कमाई केली आहे.

दोन्ही चित्रपटांची एकत्रित कमाई ५५० कोटींच्या घरात पोहोचली असून, आता सगळ्यांच्या नजरा ‘छावा’च्या ८६० कोटींच्या विक्रमी आकड्यावर आहेत. येत्या काही दिवसांत ‘कांतारा चॅप्टर 1’ आणि ‘सनी संस्कारी की तुलसी कुमारी’ हे दोन्ही चित्रपट मिळून हा विक्रम मोडण्याची शक्यता आहे.