'तारे जमीन पर', '३ इडियट्स' आणि 'छिछोरे' यासारख्या वेगवेगळ्या विषयांवर आधारीत चित्रपटांची मेजवानी प्रेक्षकांना दिल्यानंतर आता दिग्दर्शक विधू विनोद चोप्रा लवकरच नवा चित्रपट घेऊन प्रेक्षकांच्या भेटीला येणार आहे. विधू विनोद चोप्रा यांच्या '12वी फेल' (12th Fail) या नव्या चित्रपटाचा दमदार ट्रेलर नुकताच रिलीज करण्यात आला आहे. हा चित्रपट रिअल लाइफवर आधारित आहे. या चित्रपटाचा ट्रेलर खूपच दमदार आहे.
'12वी फेल' या चित्रपटामध्ये बॉलिवूड अभिनेता विक्रांत मेसी मुख्य भूमिकेत आहे. हा चित्रपट जगातील सर्वात कठीण स्पर्धा परीक्षा समजल्या जाणाऱ्या यूपीएससीसाठी प्रयत्न करणाऱ्या लाखो विद्यार्थ्यांच्या सत्यकथांवरून प्रेरित आहे. या चित्रपटाची कहाणी दिल्लीच्या मुखर्जी नगरपासून सुरू होते. जिथे हजारो मुलं आयएएस आणि पीसीएसची तयारी करताना दिसतात. हा चित्रपट त्या सर्व लोकांना ट्रिब्यूट करतो जे अपयश आल्यानंतरही हार न मानता पुढे जाण्यासाठी धैर्य आणि चिकाटी दाखवतात.
अनुराग पाठक यांनी लिहिलेल्या '12वी फेल' या सर्वाधिक विकल्या गेलेल्या कादंबरीवर आधारित हा चित्रपट आहे. जी कांदबरी आयपीएस अधिकारी मनोज कुमार शर्मा आणि आयआरएस अधिकारी श्रद्धा जोशी यांच्या अद्भुत प्रवासाला अनुसरून आहे. या चित्रपटाच्या माध्यमातून यूपीएससीची तयारी करणाऱ्या विद्यार्थ्यांचे आयुष्य, त्यांचा संयम, मेहनत, कधीही न संपणारी मैत्री याची झलक पाहायला मिळणार आहे. या चित्रपटाचा ट्रेलर पाहून यूपीएससी देणाऱ्या विद्यार्थ्यांचे खरं आयुष्य कसं असतं याचा प्रत्यय येतोय.
'12वी फेल'चे दिग्दर्शन '3 इडियट्स'चे निर्माते विधू विनोद चोप्रा यांनी केले आहे. या चित्रपटाची निर्मिती झी स्टुडिओने केली आहे. 12वी फेल हा चित्रपट 27 ऑक्टोबर 2023 रोजी जगभरातील चित्रपटगृहांमध्ये प्रदर्शित होणार आहे. 12वी फेल चित्रपट फक्त हिंदीच नाही तर तामिळ, तेलुगु आणि मल्याळम भाषांमध्ये रिलीज होणार आहे. या चित्रपटाचा ट्रेलर पाहिल्यानंतर प्रेक्षक चित्रपट रिलीज होण्याची वाट पाहत आहेत.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.