गोव्यामध्ये होणार Rakul Preet Singh आणि Jackky Bhagnani यांचे ग्रँड वेडिंग, लग्नाची पत्रिका व्हायरल

Rakul Preet Singh And Jackky Bhagnani Wedding:

बॉलिवूडचे (Bollywood) नवीन लव्ह बर्ड्स रकुल प्रीत सिंग (Rakul Preet Singh) आणि जॅकी भगनानी (Jackky Bhagnani) यांच्या लग्नाला अवघे काही दिवस उरले आहेत. या कपलच्या लग्नाची चर्चा गेल्या अनेक दिवसांपासून सुरू आहे. येत्या २१ फेब्रुवारीला ते गोव्यामध्ये लग्न करणार असल्याच्या चर्चा सुरू आहेत. पण अद्याप या कपलने अधिकृत घोषणा केली नव्हती त्यामुळे त्यांच्या लग्नाच्या तारखेबद्दल संभ्रम होता.

पण आता त्यांच्या लग्नाच्या तारखेबाबत असलेला सस्पेन्स संपला आहे. रकुल आणि जॅकीच्या लग्नाची पत्रिका समोर आली आहे. या सुंदर वेडिंग कार्डसह 21 फेब्रुवारीला रकुल आणि जॅकीच्या लग्नाची (Rakul Preet Singh And Jackky Bhagnani Wedding) तारीख निश्चित झाली. आता दोघेही गोव्यात लग्न करणार असल्याचे स्पष्ट झाले आहे. त्यांच्या लग्नाची पत्रिका सोशल मीडियावर व्हायरल होत आहे.

रकुल प्रीत सिंग आणि जॅकी भगनानी बऱ्याच दिवसांपासून एकमेकांना डेट करत आहेत. सध्या रकुल आणि जॅकी या दोघांच्याही घरी लग्नाची जोरदार तयारी सुरू आहे. लग्नाच्या तयारीदरम्यान या कपलच्या लग्नाची पत्रिका समोर आली आहे. रकुल आणि जॅकीच्या लग्नाची पत्रिका पिंकविलाने आपल्या अधिकृत इन्स्टाग्राम अकाऊंटवर शेअर केले आहे. निळ्या आणि पांढऱ्या रंगाच्या थीमवर बनवलेले हे वेडिंग कार्ड खूपच सुंदर आहे. त्यांचे लग्न गोव्यामध्ये होणार असल्याचे आता लग्न पत्रिकेवरून स्पष्ट झाले आहे.

रकुल आणि जॅकीच्या लग्नपत्रिकेवर बीच आणि सोफ्याचे चित्र दिसत आहे. या सोफ्यावर अनेक कुशन ठेवल्या आहेत. हे कार्डचे पहिले पान आहे जे निळ्या आणि पांढऱ्या रंगाच्या थीमवर आहे. यासोबतच दुसऱ्या पानावर नजर टाकली तर मंडपाचा फोटो आणि हे कार्ड गुलाबी रंगाच्या थीमवर बनवण्यात आले आहे. यावर दोघांच्या लग्नाची तारीख 21 फेब्रुवारी 2024 लिहिली आहे.

रकुल आणि जॅकीच्या घरामध्ये लग्नाच्या विधींना सुरुवात झाली आहे. नुकतीच रकुल तिच्या कुटुंबासोबत शॉपिंग करताना दिसली. याआधी अभिनेत्रीच्या घरी अखंड पाठाचे आयोजनही करण्यात आले होते. ज्याचा फोटो तिने स्वतः इन्स्टाग्रामवर शेअर केला होता.

हे कपल 21 फेब्रुवारीला गोव्यात डेस्टिनेशन वेडिंग करणार आहेत. जॅकी आणि रकुल यांच्या लग्नाचे कार्यक्रम 19 फेब्रुवारीपासून सुरू होणार असून ते 21 फेब्रुवारीपर्यंत चालणार आहेत. लग्नानंतर हे कपल 22 तारखेला मुंबईत ग्रॅण्ड रिसेप्शन पार्टी देणार आहेत. या रिसेप्शन पार्टीला बॉलिवूड सेलिब्रिटींसह अनेक जण हजेरी लावणार आहेत.