FDA Notice : तुकाराम मुंढेंचा बॉलिवूड सेलिब्रिटींना दणका! शाहरुख खानसह ३ बड्या सुपरस्टार्सला थेट नोटीस, नेमकं प्रकरण काय?

महाराष्ट्र अन्न व औषध प्रशासनाने (FDA) बॉलिवूड अभिनेते शाहरुख खान, अजय देवगण आणि टायगर श्रॉफ यांना कारणे दाखवा नोटीस बजावली आहे. 'विमल इलायची'ची जाहिरात ही प्रत्यक्षात 'विमल पान मसाला'ची (हे उत्पादन राज्यात प्रतिबंधित आहे) 'सरोगेट जाहिरात' (अप्रत्यक्ष जाहिरात) ठरते, असा आरोप यात करण्यात आला आहे.

तंबाखू किंवा निकोटीनयुक्त गुटखा आणि पान मसाल्यांविरुद्धची कारवाई प्रशासनाने तीव्र केली असताना, या तिन्ही अभिनेत्यांची आता FDA कडून चौकशी केली जात आहे. तसेच, प्रतिबंधित उत्पादनांचा व्यापार करणाऱ्या संघटित टोळ्यांशी संबंधित प्रकरणांमध्ये 'महाराष्ट्र संघटित गुन्हेगारी नियंत्रण कायदा' (MCOCA) लागू करण्यासाठी पोलीस विभागाशी समन्वय साधला जात आहे.

या आठवड्यात बजावण्यात आलेल्या नोटिशीद्वारे या तिन्ही अभिनेत्यांना जाहिरातीतील त्यांच्या भूमिकेबाबत स्पष्टीकरण देण्यास सांगण्यात आले आहे. प्रशासनाच्या मते, ही जाहिरात 'विमल पान मसाला' ब्रँडशी संबंध जोडते आणि त्यामुळे ती या उत्पादनाची अप्रत्यक्ष जाहिरात ठरू शकते. १५ दिवसांत नोटीसला उत्तर दिले नाही तर ५० लाखांचा दंड भरावा लागणार आहे. महाराष्ट्रात प्रतिबंधित असलेल्या उत्पादनांचा प्रचार केल्यामुळे ही कारवाई करण्यात आली आहे.

महाराष्ट्राच्या अन्न व औषध प्रशासन (एफडीए) आयुक्तपदी वरिष्ठ आयएएस (IAS) अधिकारी तुकाराम मुंढे यांची नियुक्ती झाली असून त्यांनी कारवाई करायला सुरुवात केली आहे. तुकाराम मुंढे यांनी आता बॉलिवूड सेलिब्रिटींना दणका दिला आहे. बॉलिवूड कलाकारांना नोटिसा अजय देवगणला त्यांच्या जुहू येथील निवासस्थानी, शाहरुख खानला वांद्रे येथील 'मन्नत' या निवासस्थानी आणि टायगर श्रॉफला त्याच्या 'टायगर श्रॉफ प्रॉडक्शन्स एलएलपी' या निर्मिती संस्थेमार्फत पाठवण्यात आल्या आहेत.