'Bigg Boss 19'च्या घरात प्रणित मोरेचं कमबॅक? मिळाली मोठी हिंट

गेल्या आठवड्यात 'बिग बॉस 19'च्या (Bigg Boss 19) घरातून सर्वांचे लाडका महाराष्ट्रीयन भाऊ प्रणित मोरेची एक्झिट झाली. त्याच्या घराबाहेर जाण्यामुळे प्रेक्षक खूप नाराज झाले आहेत. मात्र तब्येत बिघडल्यामुळे प्रणित मोरेला बिग बॉसचे घर सोडावे लागले आहे. तसेच मीडिया रिपोर्टनुसार, प्रणित मोरेला (Pranit More) डेंग्यू झाला असल्यामुळे त्याची तब्येत बिघडली. मात्र प्रणित मोरेच्या टीमकडून मिळालेल्या माहितीनुसार त्याची प्रकृती ठीक होत आहे.

'वीकेंड का वार' ला मालती , कुनिका , अशनूर आणि अभिषेकने सलमानला विचारले की, "प्रणित मोरे परत येईल का?" त्यावर सलमान खानने नकारार्थी मान डोलावली. आता 'बिग बॉस 19'ची माहिती देणाऱ्या पेज अनुसार 'बिग बॉस 19'च्या घरात प्रणित मोरे पुन्हा येणार आहे. यामुळे चाहत्यांना मोठा आनंद झाला आहे. अहवालांनुसार प्रणित मोरेने बिग बॉसच्या घरात एन्ट्री घेतली आहे. दुसरीकडे अशी देखील चर्चा पाहायला मिळत आहे की, प्रणित मोरेला सिक्रेट रुममध्ये पाठवण्यात आले आहे. मात्र अद्याप कोणतीही अधिकृत माहिती समोर आली नाही. प्रणित मोरेच्या शोमधील एक्झिटमुळे गौरव खन्ना आणि मालती चहर खूप दुःखी झाले आहेत.

या आठवड्यात 'बिग बॉस 19'च्या घरातून बाहेर जाण्यासाठी पाच सदस्य नॉमिनेट झाले आहेत. यात फरहाना भट्ट, गौरव खन्ना, नीलम गिरी, अभिषेक बजाज आणि अशनूर कौर यांचा समावेश आहे. आता बिग बॉसच्या घरातून कोण जाणार हे 'वीकेंड का वार' मध्ये पाहायला मिळेल. तसेच प्रणित मोरेची 'बिग बॉस 19'च्या घरातील रि-एन्ट्रीचेही अपडेट मिळतील. 'वीकेंड का वार'मध्ये सलमान खान कोणाची शाळा घेणार? कोणाचे कौतुक करणार हे पाहणे महत्त्वाचे ठरणार आहे.

प्रणित मोरेने बिग बॉसच्या घरात असताना देखील आपल्या कॉमेडीने प्रेक्षकांना खूप हसवले आहेत. नेटकरी सोशल मीडियावर अनेक फोटो, व्हिडीओ पोस्ट करून, आपल्या कमेंट्सच्या माध्यमातून प्रणित मोरे पुन्हा घरात यावा, अशा मागणी करत आहे. प्रेक्षकवर्ग मोठ्या प्रमाणात प्रणित मोरेची आठवण काढताना दिसत आहे.