Siddharth Jadhav : "हा सिनेमा नाही, ही आठवण आहे..."; 'आता थांबायचं नाय'चं यश पाहून सिद्धार्थ जाधव भावुक

मराठी अभिनेता सिद्धार्थ जाधव (Siddharth Jadhav) कायम त्याच्या अतरंगी स्टाइल आणि हटके अभिनयामुळे चर्चेत असतो. नुकताच त्याचा 'येरे येरे पैसा ३' प्रेक्षकांच्या भेटीला आला आहे. हा चित्रपट 18 जुलैपासून थिएटरमध्ये पाहायला मिळत आहे. चित्रपटाला प्रेक्षकांकडून खूप चांगला प्रतिसाद मिळत आहे. अशात अलिकडेच सिद्धार्थ जाधवचा 'आता थांबायचं नाय' (Ata Thambaycha Naay) चित्रपट रिलीज झाला. चित्रपटाने थिएटरमध्ये धुमाकूळ घातला आहे. प्रेक्षकांनी चित्रपटाला भरभरून प्रेम दिले. 'आता थांबायचं नाय' हा सिद्धार्थ जाधवचा पहिला चित्रपट जो 50 दिवसांहून जास्त चित्रपटगृहात राहिला.

सिद्धार्थ जाधवसाठी हा चित्रपट एक प्रवास होता. एका हरवलेल्या बापाचा आणि खऱ्या कलाकाराचा...सिद्धार्थ जाधव चित्रपटाच्या यशावर म्हणाला की, "रोज कोणी ना कोणी नवीन माणूस फोन करून कौतुक करतोय. सुमित राघवन, दिलीप रावळकर, महेश मांजरेकर यांचे फोन आले. असं वाटलं जणू सगळं मराठी अभिनय सृष्टीचं कुटुंबच जवळ आलं. 25 दिवस, मग 50 दिवस… आणि ते तुफान हाऊसफुल शोज. ती आठवण माझ्या कायम लक्षात राहील."

शेवटी सिद्धार्थ म्हणाला , "हा सिनेमा नाही, ही आठवण आहे आणि ती कायम माझ्या हृदयात राहील..." 'आता थांबायचं नाय' चित्रपटात सिद्धार्थ जाधवने मारुती कदम हे पात्र साकारले होते. जे त्याच्या नेहमीच्या शैलीपासून खूप वेगळं होतं. एक बाप जो परिस्थितीने हरवलेला आणि मुलीसाठी लढणारा...सिद्धार्थ कॉमेडी भूमिकांमधून या चित्रपटात संवेदनशील पात्रात पाहायला मिळत आहे. चाहते त्याच्या कामाचे कौतुक करत आहे. "हे सिद्धार्थचं सर्वोत्तम काम..." असल्याचे म्हणत आहेत.

'आता थांबायचं नाय' चित्रपट थिएटर गाजवल्यावर आता घरबसल्या पाहायला मिळणार आहे. 27 जुलै दुपारी 12 आणि संध्याकाळी 6 वाजता चित्रपट झी टॉकीजवर पाहता येणार आहे. चाहते यासाठी उत्सुक आहेत.